Read Bhaibhiri Idzva rechiShona Jobhu 29 Bible Online

Jobhu 29 - Bhaibhiri Idzva rechiShona bible

Jobhu 29

¹Jobhu akasimudzirazve kutaura zvakaomarara achiti,

²“Dai zvahwo upenyu hwaidzokororwa huchidzokera kumwedzi iya, Mwari paaiva mutariri wangu;

³pandaivhenekerwa paya pamusoro, pandaifamba murima nemwenje wake

⁴sezvandakanga ndakaita panguva yandanga ndabve zano; Mwari paaichengeta musha wangu pamusana poushamwari hwake,

⁵Samasimba paakanga achineni, vana vangu vakandikomberedza,

⁶ndichiri kuita mukaka wokutoshamba zvangu nawo tsoka mumatombo muchindibudira hova[23] dzamafuta.

⁷“Pandaienda kudare ndichindogarawo pachigaro changu munhandare

⁸vechiduku vaindiona vaipeuka, harahwa dzaisimuka dzichitomira.

⁹Makurukota aimbomira kutaura vachizarira miromo.

¹⁰Mazwi evokumbahuru achimbonyarara, rurimi rwavo ruchimbonamatira kumusoro.

¹¹Vanhu vaiti vakandinzwa vaindikorokotedza ziso raindiona raindinwira mvura

¹²nokuti ndaisunungura varombo munhamo nenherera dzakanga dzisina anobatsira,

¹³chikomborero chavainge vava kufa chaiuya kwandiri ndichiita kuti chirikadzi dzifare zvakadzama mumwoyo.

¹⁴“Ndaipfeka ururami ihwo huchindifukidza. Ruenzaniso ndirwo rwaiva gemenzi rangu nengundu.

¹⁵Ndaive ziso kumapofu nemakumbo kuna vakaremara

¹⁶Ndaiva baba wavarombo. Nyaya dzavatorwa ndaidzitsvaka padziri.

¹⁷Ndaityora mazino anouturu avasina kururama ndichimudonhedzesa nyama yaakabata namazino.

¹⁸Ndaifunga kuti ndichafirawo zvangu mumba mangu ndichiti mazuva angu achawanda sejecha.

¹⁹Midzi yangu ichitandavara kusvikira kumvura, iro dova rakati gudegude pamashizha angu husiku hwose.

²⁰Ndaiti mbiri yangu icharamba iripo chete, uta hwangu huri hutsva ndakahubata muchanza.

²¹“Vanhu vaitondimirira vachinyarara kuti vanzwe mazano angu.

²²Kana ndainge ndataura hapana aizotaurazve. Mazwi angu aidonha samadonhwe pavari.

²³Vaindimirira sevanomirira mvura inonaya, vakashama muromo sevanomirira mvura yobumharutsva.

²⁴Ndaiti ndikavanyemwerera havaimbofunga kuti ndini, kupenyerera kwemhanza yangu kwaivapa kusarasa mwoyo.

²⁵Ndini ndaitonga ndichisarudza zvinofanira kuitwa ndichiita samambo ari pakati pehondo dzake somunhu anonyaradza vafirwa.”