Read Bhaibhiri Idzva rechiShona Jobhu 3 Bible Online

Jobhu 3 - Bhaibhiri Idzva rechiShona bible

Jobhu 3

¹Mushure maizvozvo Jobhu akademba kuti dai zuva rake rokuberekwa risina kumbovepo.

³“Dai zuva randakaberekwa ratsakatika zvaro pamwe nousiku hwakanzi kwabatwa pamuviri mwana mukomana.

⁴Dai zuva iroro rangove zvaro zarima Mwari ari kumusoro dai arega zvake kuritsvaka uye dai chiedza charega kurivhenekera.

⁵Dai rangokwidibirwa nezarima uye nerima rakati kwirindindi sorufu. Dai rangonzi gude-gude negore rive rinotyisa nokusvipa kwaro.

⁶Usiku ihwohwo ngahunzi pute nezarima. Pamazuva egore ngarirege kuva zuva rorufaro; ngarirege kuva rimwe ramazuva egore, rirege kumbopinda zvaro mukuverengwa kwemwedzi.

⁷Ngahuve usiku husina mbereko hurege kumbonzwika mupururu wokufara.

⁸Vanorengerera rushambwa dai vangorirengerera, vanokwanisa kumutsa zigaranyanya.

⁹Nyenyedzi dzamambakwedza aro ngadzisvibe. Ngaritarisire chiedza asi risambochiwana rirege kumboona kana romoromo zvaro ramambakwedza

¹⁰nokuti harina kupfiga misuo yemimba yaamai vangu kana kuti meso angu asatarise nhamo.

¹¹Ndakaregereiko kungofa zvangu pakuberekwa, ndichingoti budei mudumbu ndichibva ndangofa zvangu.

¹²Zvakamboitikireiko kuti ndive pamakumbo uye kuti avepo mazamu okuti ini ndiyamwe?

¹³Nokuti iye zvino ndingadai ndakarara zvangu muguva, ndinyerere ndiine zororo

¹⁴pamwechete namadzimambo namakurukota enyika vakazvivakira matongo,

¹⁵kana kuti namachinda ane ndarama, akanga akazadza dzimba nesirivha.

¹⁶Ko ndakaregereiko chaizvo kungovawo zvangu gavamwedzi risingazivikanwi zvaro sesvava dzisina kumboona chiedza?

¹⁷Ikoko vaipi zvokutambudza zviya zvinopera; ikoko vanenge vaneta nebasa vanowana zororo.

¹⁸Ikoko vasungwa vanozorora pamwechete; zvokukararirwa nomushandisi webasa vanenge vasisazvinzwi.

¹⁹Vanhuwozvavo navakuru vakuru variko uye varanda vano rusununguko kuna vatenzi vavo.

²⁰Ko chiedza chinopirweiko vari munhamo zvavo uye upenyu hunopirwei vari kushushikana mumwoyo?

²¹Vanosuwira rufu asi rufu rwusingauye, vanoruchera kupinda pfuma yakavandika,

²²vanotopembera zvikuru nokufara kana vawana zvavo guva?

²³Chiedza chinopirwei munhu apiwa chidzimira akaiswa naMwari parumananzombe.

²⁴Mafemo angu ndiwo atokunda chokudya changu. Kugomera kwangu kunoteurirwa pasi semvura.

²⁵Nokuti chandinotya chacho, ndicho chinondiwana; chandinozeza ndicho chinondiwira.

²⁶Handina kugadzikana mwoyo uye handina runyararo mumwoyo mangu, ndisati ndambozorora nhamho yauya.”