Read Bhaibhiri Idzva rechiShona Jobhu 30 Bible Online

Jobhu 30 - Bhaibhiri Idzva rechiShona bible

Jobhu 30

¹Nhamo yaJobhu pari zvino. “Asi iye zvino vakandiita chiseko zvacho vanhu vadiki kwandiri, vana madzibaba vandaishora zvokuti handaikwanisa kuvaisa nembwa dzangu dzokuchengetedza zvipfuwo zvangu.

²Simba ramaoko avo rinondibatsirei, vanhu vakapera zvavo simba

³vakaonda nokushaiwa uye nenzara vanototetena midzi[24] yakaoma yenyika ine nyota murima, munyika yakaoma yerenje

⁴vaitanha makwenzi anovava vachirarama nemidzi yomutsvairo.

⁵Vakadzingwa mukati mavanhu vachisveveredzwa sembavha

⁶vachigara mumakoronga amapani nomumaguru, nomumapako

⁷unotovanzwa vachikuma mumatondo vachingourungana mukati meminzwa

⁸matununu chaiwo, vanhu vasina rudzi vakadzingwa munyika.

⁹“Asi iye zvino ini ndava rumbo chairwo kwavari uye setsumo chaiyo kwavari.

¹⁰Vanondisema, vachimirira vakataramukana neni vasingasumbe kundisvipira mate kumeso.

¹¹Nokuti Mwari akatupfunura rukungiso rwouta hwangu akandininipisa, pandiri kuzvibata vanobva vasiyana nako.

¹²Kurudyi kwangu chikwata chamadzenga chinosimuka chondidzinganisa vachindirongera nzira dzokuparadza nadzo.

¹³Vanodzivirira kwokuti nditize nako vanotowedzera njodzi yangu pamusoro peimwe, wokuvamisa hapana.

¹⁴Vanopinda vachiita sevanopinda napakapazika zvikuru vanouya vari mukati mehungwandangwanda.

¹⁵Kutya kwandibata chiremera changu chinopupurutswa sokupupurutswa nemhepo hunhu hwangu hwapfuura segore.

¹⁶“Upenyu hwangu hwava kukwenguka, mazuva enhamo andiwira.

¹⁷Usiku chirwere chinondin'ura mapfupa kurwadza kunondin'ura hakuzorore

¹⁸ndinobatwa hembe pahuro zveganyabvu. Hembe dzangu dzaunyanidzwa.

¹⁹Mwari andikanda mumatope, ndangova zvangu sehuruva nedota.

²⁰Ndinochema kwamuri asi hamupinduri ndinosimuka asi munongonditarisa zvenyu.

²¹Masanduka, mave noutsinye kwandiri munondirwadzisa noruoko rwoune simba

²²munondibvuta mondiisa mumhepo dutu richindiita suku nasai kwose kwose.

²³Ndinoziva zvangu kuti muri kundiendesa kurufu kunzvimbo yakatemerwa vapenyu vose.”

²⁴“Asi munhu anenge ari mukati memurwi wehungwandangwanda hwemba yakoromoka, haasimudzi ruoko here munhamo yake achitsvaka rubatsiro?[25]

²⁵Handina here kuchema navainge vaomerwa zuvaro, handina here kuchema navarombo?

²⁶Ndaitarisira zvakanaka ndopakauya zvakaipa. Ndaimirira chiedza asi rima ndiro rakauya.

²⁷Mudumbu mangu munomona musinganyarari, ndasangana namazuva enhamo.

²⁸Ndinofamba ndiri mukuchema kwete mukufara[26] chandinosimukira pana vanhu kukumbira rubatsiro.

²⁹Ndave shamwari yamakava nehama yemhou.

³⁰Ganda rangu rasviba ravakukwatanuka mapfupa angu anotsva nokupisa.

³¹Chipendani changu chava nziyo dzokuchema nyere yangu yava yokutsinhira vanochema.”