Read Bhaibhiri Idzva rechiShona Jobhu 31 Bible Online

Jobhu 31 - Bhaibhiri Idzva rechiShona bible

Jobhu 31

¹Ini ndakatsidzira maziso angu kuti haachazotarisa musikana ndichimuchiva.

²Pakadaro ndingawane mugove wei kubva kuna Mwari kumusoro kana nhaka yangu, kubva kuna Samasimba kumusoro.

³Handiti vasina kururama vanowirwa here nenhamo navaiti vezvakaipa vachiwirwawo nejambwa?

⁴Asi iye, handiti anoona magariro angu achiverengawo nhanho dzangu dzose?

⁵Dai kuri kuti ndakashamwaridzana nenhema rutsoka rwangu ruchimhanyirirana nounyengedzi,

⁶Mwari ngaandiere muchikero chiri pachokwadi achaziva kuzvibata kwangu.

⁷Kana ndakatsauka panzira ndikatevera meso meso angu, uye kana maoko angu anechakaipa chakanamirana nawo,

⁸pakadaro regai ndidyare asi mumwe ave ndiye anochidya uye mbeswa dzangu ngadzidzipurwe zvadzo.

⁹Kana ndakatorwa mwoyo nomumwe mukadzi uye kana ndakamiramira pamusuwo womumwe wangu

¹⁰mudzimai wangu ngaanokuya mbeswa dzomumwe atorwe zvake nomumwe murume.

¹¹Nokuti ingadai iri mhaka yakaipisisa kwazvo. Hungadai huri huipi hunofanira kurangwa navatongi.

¹²Ungadai uri moto unoparadza nokusingaperi ungadai uchitopisa zvinhu zvangu zvose kusvika pokupedzisira pazvo.

¹³Kana ndakaramba kunzwa chichemo chomuranda wangu wechirume kana wechikadzi chokundinyunyutira,

¹⁴ndinozoita sei kana Mwari asimuka, kana wobvunza ndichamupindurei.

¹⁵Ko iye akandisika munhumbu haasiriye akavasikawo here? Akatisika tose, haasiriye mumwechete here?

¹⁶Kana ndarambira chaidiwa nomurombo kana kudzimaidza chirikadzi,

¹⁷kana kudya ndoga mukonde ndichinyima nherera

¹⁸nokuti kubvira pahuduku hwake ndaimurera sababa kubvirawo mudumbu mamai vake ndakamutungamirira.

¹⁹Dai kuri kuti ndakaona munhu achiparara pamusana pokushaya hembe kana kuti murombo asina chokupfeka

²⁰kana kuti muviri wake usina chaungati ngandikomborerwe nacho pamusana pokumudziisa nemvere dzehwai dzangu.

²¹Kana dai kuri kuti ndakasimudza ruoko rwangu kurwisana nenherera ndichiziva kuti ndine simba padare,

²²pakadaro bendekete rangu ngarikwachukire pasi ruoko rwangu rwudambuke pamasanganirano arwo

²³nokuti ndaitya nhamo yaizobva kuna Mwari uye handaimbopamira noukuru hwake.

²⁴Dai ndakaisa mwoyo wangu mundarama kuti ndichiti ndarama ndiyo yondovimba nayo.

²⁵Dai ndaifarisa pamusana pokuwanda kwoupfumi hwangu kana kuti ndawana zvakawanda namaoko angu.

²⁶Dai kuri kuti ndakatarisa zuva nezuva ndakambotorwawo mwoyo parino penya kana nemwedzi mukufamba kwawo kunoyevedza

²⁷ndikatorwa mwoyo ndikazviombera muchivande

²⁸chingadai chiri chitadzo chinofanira kurangwa navatongi nokuti ndingadai ndisina kutendeka kuna Mwari wokumusorosoro.

²⁹Dai kuri kuti ndakafarira kuparara kwomuvengi wangu kana kufara paainge awirwa nenhamo.

³⁰Handina kurasa muromo ndichiti dai awana chinomuwana.

³¹Pane womumusha mangu here akanga asingati, Ndiani asina kumboguta nenyama yake?

³²Hapana muenzi akamborara panze mukova wangu waigara wakazurukira vaenzi.

³³Dai kuri kuti ndakavigiridza uipi hwangu kuvanhu nokuviga uipi hwangu mumwoyo

³⁴pamusana pokutya uzhinji hwavanhu kana kutya kushorwa nemhuri zvokuti ndainyarara ndisingabudi mumba.

³⁵Dai ndiine angandinzwewo zvake ini ndasaina; iye Samasimbaose ngaachindipindura; mupomeri wangu ngaaite mhosva yangu yokunyora,

³⁶ndingatoita yokutakura pafudzi, ndaitosungirira mumusoro sendaza,

³⁷ndaimurondedzera zvose zvandakaita, ndaienda kwaari somuchinda.

³⁸Kana kuri kuti nyika yangu yakachema neni zvichibatsirana nemakoronga,

³⁹kana ndakadya chayo pasina muripo ndikakonzera rufu rwavaridzi vayo, dai mukamera zvamo minzwa panze pekoroni uye sora panze peBhari.

⁴⁰Ndipo pakaperera Jobhu kutaura.