Read Bhaibhiri Idzva rechiShona Jobhu 33 Bible Online

Jobhu 33 - Bhaibhiri Idzva rechiShona bible

Jobhu 33

¹“Zvino iwe Jobhu chinzwa zvandava kutaura uteere zvose zvandichareva.

²Hezvo ndava kuzarura muromo wangu rurimi rwangu rwava kutaura mukanwa mangu.

³Zvandinotaura zvinobva mukutendeseka kwemwoyo wangu. Miromo yangu ichataura iri pachokwadi zvandinoziva

⁴nokuti Mweya waMwari ndiwo wakandisika femo raSamasimba ndiro rakandipa upenyu.

⁵Kana muchikwanisa ndipindurei nyatsondirongerai mashoko enyu.

⁶Chizvigadzirirai pana Mwari ndakangoitawo semi kana neniwo ndaiumbwa nevhu.

⁷Saka hamuna chokunditya uye kwandiri hapana chingakuremerei.

⁸“Ndakunzwai imi muchitaura ndichinzwa, ndatonzwa ini maungira amazwi enyu

⁹muchiti ndakachena ini handina chikanganiso. Ndakachena handina mhosva yandinayo

¹⁰asi Mwari anondipomera mhosva anondiona semhandu yake.

¹¹Anondisungirira makumbo mumatanda achindigaririra munzira dzose.

¹²Mhinduro yandinokupai[27] ndeyokuti munaizvozvi hamuna imi kururama Mwari mukuru kune munhu wose.

¹³Munoitirei nharo naye muchiti haasikupindura zvose zvandiri kutaura.

¹⁴“Mwari anomboti taurei odzokororazve kaviri kaviri kunyange munhu asingazvioni.

¹⁵Anogona kutaura muchiroto kana muchioneso chousiku munhu akabatwa chaizvo nehope achikotsira pauriri hwake.

¹⁶Ndipo paanozarura vanhu nzeve obva aona kuti chaanoda kuti vadziidze vachidzidza,

¹⁷kuti munhu apinduke pane zvaanenge achiita uye kuti munhu arege kuzvikudza.

¹⁸Anodzivirira munhu kuwira mugomba uye kubaiwa nepfumo.

¹⁹Mumwewo anomutsiura nokumurwadzisa pabonde nemapfupa anoramba achingogweda

²⁰zvokuti chokudya chinosvibisa mwoyo uye anosema machikichori.

²¹Anoonda zvokusara asisaoneki nyama mapfupa akanga asingaoneki achiti pachena charavanda.

²²Anenge oswedera kuguva uye upenyu hwake hwoswedera kuna vanouraya.

²³Dai kuri kuti pane mutumwa, mumiriri kudivi kwake mumwechete pakati pechiuru, kutsanangurira munhu zvakamunakira.

²⁴Zvino anomunzwira urombo oti mununurei arege kuwira mugomba, ndawana chokumununura nacho.

²⁵Nyama yake angaiite zvayo seyapauduku adzokere kusimba rake rouduku.

²⁶Ipapo munhu achanyengetera kuna Mwari Mwari agofadzwa naye munhu anouya kwaari norufaro Mwari achimudzorera ururami hwake.

²⁷Ndopaachaita zvokuimba kwazvo kuvanhu achiti, ‘Ndakatadza ini ndikaipisa zvakarurama asi handina kuzvirangirwa.

²⁸Akandinunura kuti ndirege kuenda mugomba upenyu hwangu huchaona chiedza.’

²⁹“Chionaika kuti Mwari anoita izvozvi zvose kumunhu kaviri kaviri kana katatu.

³⁰Kuti adzose mweya wake kugomba kuya kuti awane chiedza chavapenyu.

³¹Zvino iwe Jobhu teerera undinzwe, umbonyarara nditaurewo.

³²Kana une chokutaura ndipindure taura nokuti chandinoda kuti iwe unzi wakarurama.

³³Kana pasina, wochimbonditeererawo wombonyarara zvako ndimbokudzidzisa ungwaru.”