Read Bhaibhiri Idzva rechiShona Jobhu 34 Bible Online

Jobhu 34 - Bhaibhiri Idzva rechiShona bible

Jobhu 34

²“Chinzwai zvandinotaura imi vangwaru munditeerere, iyemi munoziva

³nokuti nzeve inoedza mazwi sokuravira kunoita mukanwa chokudya.

⁴Ngatitarisei kuti chatinoti chakarurama chinhu chakaita sei tirairidzane kuti chakanaka chii.

⁵“Nokuti Jobhu anoti ini handina mhaka asi Mwari ari kuramba kundiitira zvino ruenzaniso.

⁶Kutongwa kwangu ndekwenhema, ronda rangu haripori kunyange pasina chandakatadza.

⁷Pano mumwe munhu here akaita saJobhu anodhadhaira zvake seari kunwa mvura

⁸asi iye achifambidzana navaiti vezvakaipa, anofamba navaipi.

⁹Nokuti vanoti hapana chavanowana nokufadza Mwari.

¹⁰“Saka chindinzwai imi vanonzwisisa zviri kure kwazvo naMwari kuti aite zvakaipa kana kushaika kworuenzaniso pana Mwari

¹¹nokuti anopa munhu mubayiro wezvaakaita achiita kuti munhu awane zvinokodzerana namaitiro ake.

¹²Ndezvechokwadi kuti Mwari haamboita zvakaipa, Samasimbaose haambominamisa ruenzaniso.

¹³Ndiani akaisa nyika mumaoko make? Ndiani akawarira pasi pose?

¹⁴Dai kuri kuti ambozviti mumwoyo make, regai abvise mweya wangu nefemo rangu zvidzokere kwandiri,

¹⁵chinhu chose chipenyu chingaparare, munhu anobva adzokerazve kuvhu.

¹⁶Kana muri munhu anonzwisisa inzwai izvi, teererai zvandava kutaura.

¹⁷Asingadi ruenzaniso angatonge here? Mungade kupa mhosva iye Mururami Samasimbaose here?

¹⁸Anoti kuna madzimbo vanhu pasina, kuna machinda, ovati vanhu vakaipa.

¹⁹Asina zvechizivano namachinda kana kuremekedza vapfumi kupinda varombo nokuti ndiye akavasika vose namaoko ake.

²⁰Vanofa nenguva isipi pakati pousiku, vanhu vanozunzwa vachipfuura, vane simba vanobviswa kwete namaoko avanhu.

²¹“Nokuti ziso rake rinoongorora zvinoita munhu; anoona mafambiro ake ose.

²²Hakuna zarima kana rima rakati kwirindindi munogona kuhwandwa navaiti vezvakaipa.

²³Haana kurongerana nomunhu nguva yokuti apinde dare raMwari nayo.

²⁴Anoparadza vana masimba, pasina zvokumbobvunza achiisa vamwe panzvimbo pavo.

²⁵Saizvozvo anoziva mabasa avo anovapidigura nousiku humwechete vachibva vaparara.

²⁶Anovapa shamhu pamusana pouipi hwavo vanhu vachizviona.

²⁷Nokuti vakamupa gotsi, vasina kana hanya nenzira dzake.

²⁸Vakakonzera kuti kuchema kwavarombo kusvike kwaari. Akanzwa chichemo chavatamburi.

²⁹“Akanyarara zvake, ndiani angamupe mhosva? Akavanza huso ndiani angamuone? Rungave rudzi kana munhu mumwechete.

³⁰Kuti munhu asiri munamati atonge kuti arege kuteya vanhu.

³¹Angati here kuna Mwari ndakatadza asi handichatadzazve

³²zvandisingaoni ndidzidzisei kana ndakaita zvakaipa handichazviitazve?

³³Zvino mubayiro waanopa pakadai anofanira kuupa samafungiro ako here iwe usingawirirane nawo? Ndiwe unofanira kusarudza, kwete ini kuti chii chamunoziva, tiudzei.

³⁴Vanhu vanonzwisisa vangatoti kwandiri nevangwaruwo vanondinzwa vangati,

³⁵‘Jobhu uyu haazivi zvaanotaura zvaanotaura hazvina kunzwisisa mukati.

³⁶Dai zvavo Jobhu aongororwa kusvika pokupedzisira nokuti anopindura somunhu akaipa.

³⁷Anotowedzera kupanduka pamusoro pechitadzo chake achitopamhidzira uipi pakati pake achitowanziridza mashoko ake okurwisana naMwari.’ ”