Read Bhaibhiri Idzva rechiShona Jobhu 35 Bible Online

Jobhu 35 - Bhaibhiri Idzva rechiShona bible

Jobhu 35

¹Erihu akatizve,

²“Munofunga kuti zvakanaka here zvokuti makarurama pamberi paMwari?”

³Muchitoti zvenyu kwaari, “Hazvinei nemi uye zvinondibatsirei kana ndikakutadzirai Mwari kana ndikarega kukutadzirai.”

⁴Ini ndichakupindurai pamwechete neshamwari dzenyu.

⁵Tarisai kudenga muone makore ari pamusoro kupinda imi.

⁶Kana mukatadzira Mwari chamunenge momurwadzisa ipapo chii? Kana kukanganisa kwenyu kukawanda iye chamunomuita chii?

⁷Chamunomuwanisa nokururama kwenyu chii? Chaanowana kwamuri chii?

⁸Uipi hwenyu hunorwadza mumwe munhu akaita semi, ururami hwenyu hunobatsira munhu.

⁹Pamusana poudzvinyiriri kwakawanda, vanhu vanochema vanochemera rubatsiro pamusana pechisimba choruoko rwavane simba.

¹⁰Asi hapana anoti, “Mwari Musiki wangu aripi iye anopa kuti vanhu vaimbe usiku.

¹¹Iye anodzidzisa isu vanhu kupinda mhuka dzenyika achitiita isu vakangwara kupinda shiri dzedenga.

¹²Vanhu vanochema asi haapinduri pamusana pokuzvikudza kwavanhu vakaipa.

¹³Ichokwadiwoka kuti Mwari haateereri kuchema kusina maturo iye Samasimba haambozviitira hanya.

¹⁴Zvinobva zvatonyanya kuipa kana imi muchitoti zvenyu hamumuoni inga nyaya iri pamberi pake wani, chenyu imi kumirira zvenyu.

¹⁵Asi nokuti Mwari nehasha dzake haasi kuranga achiita seasingazivi zvake kukanganisa kwacho.

¹⁶Jobhu ndipo paanobva amwauka zvake kutaura achiondomoka zvake kutaura twakawanda twaasingazivi.”