Read Bhaibhiri Idzva rechiShona Jobhu 36 Bible Online

Jobhu 36 - Bhaibhiri Idzva rechiShona bible

Jobhu 36

¹Erihu akaenderera mberi kutaura achiti,

²“Chimbondiitirai zvenyu mwoyo murefu. Ndikuratidzei kuti pachine zvimwe zvokutaura ndakamiririra Mwari

³zvandinoziva zvinosvika nokokoko. Ndicharatidza kuti musiki wangu mururami

⁴nokuti chokwadi chaizvo zvandinoreva hazvisi nhema. Wamunaye izvozvi ndoweruzivo rwakaperera.

⁵“Chinzwai munzwe Mwari ane simba uye haana waanoshora Mwari ishasha pasimba rokunzwisisa.

⁶Havaite kuti vakaipa varambe vari vapenyu, vanotambura anovapa zvavanofanira kuva nazvo.

⁷Ziso rake haribvi pamururami asi anovagadza namadzimambo pazvigaro zvoumambo anovagadza nokusingaperi vachizorumbidzwa.

⁸Kana vari muusungwa netambo, vakasungwa netambo dzezvinorwadza.

⁹Ipapo anovazivisa zvavakaita nezvavakanganisa nokuti vanenge vachizvikudza.

¹⁰Anovazarura nzeve kuzvidzidziso achiti vadzoke vachibva kuuipi.

¹¹Vakateerera nokumushandira, vanopedza mazuva avo mukubudirira, uye makore avo mumutambaratede.

¹²Vakarega kuteerera, vanopera nebakatwa rehondo vachifa vasina zvavanoziva.

¹³Vasiri vanamati, mumwoyo mavo vanofarira hasha, havacheme kwaari kuti avabatsire kana avasunga.

¹⁴Vanofa vari vadiki, ndihwo upenyu hwacho pakati pemhombwe dzepatemberi.

¹⁵Asi Mwari anonunura vari munhamo nenhamo iyoyo achivazarura nzeve nokutambudzika ikoko.

¹⁶“Kunyange imi, ari kuda kukubvisai munhamo kuti akuisei munzvimbo yakafara isina kumanikana. Tafura yenyu yakanga yakazara nokudya.

¹⁷Imi makazadzisa mamuri kutongwa kwavaipi kutongwa noruenzaniso zvakuwanai.

¹⁸Chenjerai kunyengedzwa nepfumbamuromo kana kutsautswa noupfumi.

¹⁹Hazvina chimuko kuti mukumbire rubatsiro. Simba renyu rose harikwanisi kukubatsirai zvino.

²⁰Musasuwire kuti usiku husvike nguva inotsakatiswa marudzi avanhu kubva mumisha yavo.

²¹Chenjera kuti usapindukire kune zvakaipa ndokusaka iye zvino uchiedzwa nenhamo.

²²Tarisai muone kuti Mwari, anokudzwa kwazvo pasimba rake. Ndiani mudzidzisi akaita saiye?

²³Ndiani akamutaurira maitiro aangaite. Ndiani angati kwaari wakatadza?

²⁴Rangarira kurumbidza mabasa ake akaimbwa navanhu.

²⁵Munhu wose anoaona, munhu anoatarisa nokure.

²⁶“Chinzwai munzwe, Mwari mukuru zvokuti hatimuzivi, kuwanda kwamakore ake hakuverengeki.

²⁷Nokuti anoumba madonhwe emvura, ndimo mozobva mvura inonaya kusvika kumhute.

²⁸Ndiyo yacho inozonaiwa namatenga ichidururika zvakanyanya pavanhu vose.

²⁹Pane munhu anganzwisise here kupararira kunoita makore uye kuti munotinhira sei mukazumba kake ikako?

³⁰Hauone here kumwararisa kwaanoita mheni paari? Inozadza kunyange hwaro hwegungwa.

³¹Ndizvo zvaanotonga nazvo vanhu achipa vanhu chokudya chakawanda.

³²Anozadza mheni muchanza achiiti irove paanoda kuti irove.

³³Kudhiriridza kwayo kunoyambira kuuya kwedutu, kunyange mombe dzinonzwa kuti iri kuuya.”