Read Bhaibhiri Idzva rechiShona Jobhu 37 Bible Online

Jobhu 37 - Bhaibhiri Idzva rechiShona bible

Jobhu 37

¹Izvozvi zvinoita kuti mwoyo wangu udedere zvokutenge uchasvetuka panzvimbo pawo.

²Dotererai munzwe kutinhira kwezwi rake, maungira anobva mumuromo wake,

³Anoati tupfunu nedenga rose, nemheni yake inosvika kumativi ose enyika.

⁴Mushure mayo izwi rake rinotinhira anoriridza nezizwi rake rinoremekedzwa mheni haaidzore kana izwi rake ranzwika.

⁵Mwari anodzvova nezwi rinoshamisa. Anoita zvishamiso zvatisingakwanisi kunzwisisa

⁶nokuti anoti chando ngachidonhe panyika anotiwo kuhore kana mvura yokunaya ngainaye zvine simba.

⁷Anombomisa vanhu mabasa amaoko avo kuitira kuti munhu wose azive mabasa ake.

⁸Ipapo zvikara zvinotombopinda mumatanga azvo zvichitombogara imomo mumapako azvo.

⁹Dutu remhepo rinobva kumaodzanyemba nemhepo yechando inovhuvhuta ichibva kuchamhembe.

¹⁰Nezwi raMwari kunouya chando mvura yakapararira inogwamba nokukurumidza.

¹¹Anozadza makore makobvu nemvura makorewo achiwadzura mheni uko nokoko.

¹²Makore anopidiguka-pidiguka achipishinuka kuenda nerimwe divi achitungamirirwa naMwari kuitira kuti aite zvose zvaanenge ati aite pasi pasi panogara vanhu.

¹³Anoita kuti zviitike kunyika yake, iri shamhu kana mwoyochena wake.

¹⁴Teerera unzwe iwe Jobhu. Dai ukamboti mirei urangarire mabasa aMwari anoshamisa.

¹⁵Unoziva here kuti Mwari anoatonga sei nokuita kuti mheni ipenye mumakore?

¹⁶“Unoziva here kuti makore anoyangarara sei mudenga umu, basa roruzivo ruzere rwaMwari.

¹⁷Iwe unodikitira muhembe dzako pamusana pemhepo yokumaodzanyemba.

¹⁸Ungakwanise here iwe kuita zvaanoita zvokutambanudza ziendanakuenda redenga, rakaomarara sechiringiriro choutare hwakaita zvokunyungurutswa?

¹⁹Chitiudza zvokumutaurira, hapana chatinokwanisa kuronga nokuda kwerima ratiri.

²⁰Zvandinotaura handiti zvinosvitswa kwaari, kungatova kuzvitsvagira kuparadzwa ikoko.

²¹Pane nguva dzokuti cheidza chinenge chisingaoneki chakadzivirirwa namakore kusvikira mhepo yapfuura ichiabvisa.

²²Kuchamhembe kunobuda ruvara runenge ndarama, chiremera chinenge chiri chaMwari chinotyisa.

²³Samasimba, asingabatiki, ari pamusorosoro apo nesimba aine ruenzaniso, noururami hwakawanda asina waanokanganisira.

²⁴Ndokusaka vanhu vachimuremekedza iyewo asingambotarisi zvake munhu anozvitora.”