Read Bhaibhiri Idzva rechiShona Jobhu 38 Bible Online

Jobhu 38 - Bhaibhiri Idzva rechiShona bible

Jobhu 38

¹Zvino Tenzi akazopindura Jobhu mukati medutu remhepo achiti,

²“Ndianikowo zvake iyeyu anopinza zano murima nokutaura kwake kusina ruzivo,

³chipfeka zvino uite somurume ndikubvunze, iwe unditaurire.

⁴“Wakanga uri kupi iwe pandaidzika ugaro hwenyika? Taura zvako kana uchinzwisisa.

⁵Ndiani akaisa miganhu yayo nokuti unozivaka iwe? Kana kuti ndiani akaiera netambo?

⁶Ugaro hwayo hwakadzikwa pai, ndiani akaisa dombo rapakona,

⁷Nyenyedzi dzemambakwedza padzakaimba pamwechete vana vaMwari pavakapururudza norufaro?

⁸“Ndiani akazarira gungwa nemakonhi, parakanga richangobva mukuberekwa?

⁹Pandakaita kuti makore ave hanzu dzaro nerima rakati kwirindindi kuti riiputire

¹⁰ndikariisira miganhu nezvihuri nemakonhi

¹¹ndikati, ‘Apa ndipo paunogumira kwete kupfuura ipapa uye kuti masaisai ako anozvitutumadza ndipo paanomirira.’

¹²“Wati wamboti mangwanani avepo here kubvira nokubvira kwoupenyu hwako nokupa mambakwedza chinzvimbo chawo,

¹³asvike kuti abate kwakaperera nyika vakaipa vazunzwemo

¹⁴achiasandura kuva matsvuku[28] sekutsvukisa kunoita chidhindo pamunyakwe ichipindurwa ruvara sehanzu?

¹⁵Vakaipa vanobva vambotorerwa mwenje wavo simba ramaoko avo richimbomiswa.

¹⁶“Wati wambopinda here muzvisipiti zvegungwa, kana kufambawo zvako muhwenje hwakadzama?

¹⁷Wati wambozarurirwa here misuo yorufu kana kuona makonhi okurima rakati ndoo?

¹⁸Unonyatsozivisisa here iwe upamhi hwenyika? Nditaurire kana uchiziva.

¹⁹“Nzira inoenda kumusha wechiedza ndeipi nokunogara rima ndokupi?

²⁰Waigonaka kutondozviisa kunzvimbo yazvo, unozivaka iwe nzira yokumusha kwazvo.

²¹Unoziva iwe nokuti ipapo wakanga watoberekwa, nokuti nguva youpenyu hwako yakareba.

²²“Wakambopinda here mudura ramazaya echando, kana kudura rechivhuramahwe,

²³zvandakachengetera nguva yokunge zvinhu zvaipa, nguva yehondo nokurwa?

²⁴Unoziva here nzira inopararaniswa nayo chiedza uye kuti mhepo yokumabvazuva inoparadzirwa sei panyika.

²⁵Ndiani akachera migero yemvura yamapopopo, napanofamba namabhanan'ana?

²⁶Achinaisa mvura panyika isina ari kugarapo, mugwenga musina munhu.

²⁷Achinyorovesa renje zvaro rakaoma achiita kuti ivhu rimere uswa

²⁸mvura inonaya ina baba here, ndiani akabereka madonhwe edova?

²⁹Mazaya echando akabva mumimba maani? Ndiani akabereka chando chinochena chedenga?

³⁰Mvura inogwamba kuita sedombo pamusoro pehwenje hwegungwa panogwamba.

³¹“Unogona here iwe kusunga tambo dzenyenyedzi dzechinyamutanhatu, kana kusunungura tambo dzenyenyedzi dzechinyamutatu?

³²Unogona here kutungamirira boka renyenyedzi nemakwara aro? Ungatungamirire hweva navana vayo here?

³³Unoziva here mitemo yamatenga, ungadzike here mitemo yawo panyika?

³⁴Ungadaidzire here kumakor? uchiaudza kuti mvura zhinji ikufukidze.

³⁵Unogona here kutumira mheni kuti dziende, idzo dzichiti tiri pano?

³⁶Ndiani akaisa ungwaru mumakore kana kupa kunzwisisa kumhute?

³⁷Ndiani nenjere dzake angaverenge makore kana angarereke maguchu iwayo amatenga?

³⁸Nyika ichibva yanyongodeka kuva chinhu chimwechete madhaka achikurumidza kubatana. Zvishamiso zvemhuka dzesango.

³⁹“Ungavhimire here mhuka, shumba, kana kugutsa nhomba yeshumba dzechidiki?

⁴⁰Padzinoti hwatata mumapako adzo kana padzinovanda muuswa.

⁴¹Ndiani anopa rukodzi nyama vana varwo pavanochemera kuna Mwari vachidzungaira pamusana pokushaya chokudya?”