Read Bhaibhiri Idzva rechiShona Jobhu 39 Bible Online

Jobhu 39 - Bhaibhiri Idzva rechiShona bible

Jobhu 39

¹“Unoziva here nguva inobereka ngururu? Wakamboona here mhara painobereka?

²Wati wamboverenga here mwedzi yadzinotora? Unoziva here nguva yadzinozobereka,

³padzinogodama dzavakubereka, dzichisungunuka pamutowo wadzo?

⁴Vana vadzo vanokura musango, vanozoenda uye havazodzoka kwavari.

⁵“Ndiani akapa dhongi romusango rusununguko rwarinarwo? Ndiani akasunungura makashu embizi?

⁶Ndakaripa renje kuti rive musha waro, mapani omunyu kuti ave pokugara paro.

⁷Rinotoseka zvaro bongozozo romuguta, hariteerere kuzhamba kwomuchairi.

⁸Makomo arinombeya nawo ndiwo ufuro hwaro richitsvaka chose chinomera chinyoro.

⁹“Nyati ingabvume here kukubatira basa, ingabvume here kuve muchidyiro chako?

¹⁰Ungaibope mumuforo nezvitorobho here kana iyo kukuharira bani ichikutevera?

¹¹Ungavimbe here nesimba rayo guru, ungairege ichikuitira basa here?

¹²Ungavimbe nayo here kuti inodzoka, ichiuya nembeswa dzako kuburiro?

¹³[29] “Mapapiro[30] emhou anobhabhama nomufaro minhenga namanhenga ayo zvakafanana here nezveshuramurove?

¹⁴Inosia mazai ayo pasi kuti adziiswe pavhu,

¹⁵ichikanganwa kuti rutsoka rungaapwanya, mhuka dzesango dzingaatsokodzere.

¹⁶Inobata vana vayo zvino utsinye sokunge vasiri vana vayo kunyange zvichizoita kuti basa rayo rive risina chimuko asi haityi,

¹⁷nokuti Mwari akainyima ungwaru, akarega kuipa mugove wokunzwisisa.

¹⁸Asi ikati fukusu kutiza inotoseka zvayo bhiza nomutasvi waro.

¹⁹“Ndiwe unopa bhiza simba raro here? Ndiwe here unoripa mutsipa waro simba?

²⁰Ndiwe here unoripa kuchirika semhashu, kufemuruka kwaro kunotyisa?

²¹Rinogiga pasi mubani, rinozvitora nesimba raro. Rinoenda kundosangana nezvombo zvokurwa.

²²Kutya rinokuseka, uye harivhunduki. Haridzokeri shure nokutya bakatwa.

²³Goba remiseve rinongwerengwedza kumusana kwaro. Pamwechete nepfumo rinopenya nepfumo diki.

²⁴Rinozuzuma namanyawi rigopedza pasi, harimiri kana hwamanda yarira.

²⁵Panorira hwamanda harizobatiki ari kure anonzwa hondo kunhuhwa, kuriridza nokuzhamba nokukaradza kwavatungamiri vehondo.

²⁶“Ungwaru hwako here hunoita kuti rukodzi rubhururuke ruchitambanudzira mapapiro arwo kuenda kumaodzanyemba?

²⁷Ndiwe unoudza gondo kuti ribhururuke muchadenga here kuti rinoita dendere raro pamusoro?

²⁸Rinondogara padombo richiita musha waro pamawere edombo rine man'an'a.

²⁹Ndoparinonyatsocherechedza nyama yaro, ziso rinoiona riri kure.

³⁰Kunyange vana varo vanosveta ropa, panenge pangofa chinhu iro riripo.”