Read Bhaibhiri Idzva rechiShona Jobhu 4 Bible Online

Jobhu 4 - Bhaibhiri Idzva rechiShona bible

Jobhu 4

¹Hurukuro dzokutanga. Erifasi muTemani akapindura achiti,

²“Kuri kuti munhu ataura nemi mungashatirwe nazvo here, asi ndiani angarege kutaura?

³Inga makadzidzisa vazhinji mukasimbisa maoko asina simba.

⁴Mashoko enyu akatsigira ainge odzadzarika mukasimbisa mabvi akarukutika.

⁵Asi nhasi zvakuwanaiwo, zvino motadza kugadzikana. Asi zvino zvakubatai mabva mava kurasa mwoyo.

⁶Handiti kutya kwenyu Mwari ndiko kwamunovimba nako, kuva pachokwadi mumaitiro enyu kuri iko chitarisiro chenyu?

⁷“Chimbozvifungaiwo zvenyu kuti ndiani aiva mururami akaparara uyewo ndokupi mururami kwaakaparadzwa?

⁸Zvandakaona zvangu ndezvokuti vanorima huipi nokudyara nhamo vachakohwawo zvimwechetezvo,

⁹vanoparadzwa nefemo raMwari vachatsakatiswa nomweya wehasha dzake.

¹⁰Kuomba kweshumba kwapera, nenzwi rinotyisa remhondoro. Mazino eshumba dzichiri kuzvinzwa akatyorwa.

¹¹Gono reshumba riri kuparara nokushaya nyama vana veshumbahadzi vapararira.

¹²“Zvino pane shoko rakaunzwa kwandiri muchivande nzeve yangu yakanzwa zevezeve raro.

¹³Pfungwa yechiroto chinotyisa[3] vanhu paye patinobatwa chaizvo nehope.

¹⁴Ndakawirwa nokutya kukuru uye ndakadedera zvakaita kuti mapfupa angu angwedereke.

¹⁵Mhepo yakati fefefe napandiri mvere dzomuviri wangu dzikamira kuti twi.

¹⁶Pakamira chimwe chinhu chandisina kuona mamiriro acho chakamboti mirei pamberi pangu ndokuti ziro-o ndokuzonzwa izwi richiti.

¹⁷“Ko iye munhu zvake anofa angava munhu akarurama here pamberi paMwari?[4] Munhu angave mutsvene here pamberi pomusiki wake?

¹⁸Haavimbi kunyange nevaranda vake kunyange vatumwa anovabata nemhosva.

¹⁹Ko kutozotiwo zvavo vanogara mudzimba dzevhu dzine ugaro hwadzo muvhu vanofa sebetebeswa.

²⁰Pakati pamangwanani namanheru vanoparadzwa, vanotsakatika pasina anombozviona.

²¹Kunyange tambo yakatumba kavo yavhomorwa vanofa vasina kana ungwaru.”