Read Bhaibhiri Idzva rechiShona Jobhu 41 Bible Online

Jobhu 41 - Bhaibhiri Idzva rechiShona bible

Jobhu 41

¹“Ungagone kuzapura zigaranyanya[34] nechirauro here, kana kuribata rurimi nomusungo here?

²Ungagone here kusungirira tambo mumhuno dzaro? Kana kubaya dama raro nechirauro?

³Ringakuteterere here? Ringaite zvokukunyengetedza here?

⁴Ringaite chitsidzirano newe here kuti rive muranda wako nokusingaperi?

⁵Ungatambe naro here sokutamba kwaungaite neshiri kana kurisungirira pambambo kuti uvaraidze vasikana naro?

⁶Vashambadzi vangaritengeserane here? Vatengesi vangarichekane here?

⁷Ungazadze here ganda raro namapfumo enzeve, kana musoro waro namapfumo okuraurisa?

⁸Ingoribata chete uone mabimbiri aunoita naro. Hauzozvipamhidzazve.

⁹Zvokuripingudza hazviiti. Iko kungoriona chete kunokuzadza nokutya.

¹⁰Hapana anogona kuridenha ndiani zvino angamirisane neni?

¹¹Ndiani wandine chikwereti naye? Wandinofanira kudzorera. Chinhu chose chiri pasi pedenga ndechangu.

¹²Handinganyarare nezvemakumbo ake kana nesimba rake guru kana nezvechimiro chake chakarurama.

¹³Ndiani angaripfekenure ganda raro rokunze kana kubaya ganda raro rakapetwa kaviri.

¹⁴Ndiani angafare kuzarura makonhi ouso hwaro panotyisa kudaro nemazino akati checheteere kutenderedza?

¹⁵Musana waro wakaitwa nemitsara yenhowo dzakarundana sedzakanamatidzwa.

¹⁶Dzikabatana zvokuti hapana mweya ungapinde pakati pawo.

¹⁷Akabatana-batana zvokurundana zvokuti hadzikwanisi kuparadzaniswa.

¹⁸Kuhetsura kwaro kunobarika moto maziso aro akaita samafungiro amangwanani.

¹⁹Mukanwa maro munobuda marimi emoto mapfarivari emoto anorauka imomo.

²⁰Mumhuno dzaro munopfumbuka utsi sounobva muhari inovira yangandutswa netsanga.

²¹Femo raro rinobakisa moto wamasimbe rimi romoto rinobuda mumuromo maro.

²²Simba riri mumutsipa waro pariri panotyisa.

²³Mafinyamafinyama omuviri waro akabatana-batana zvakasimba akasimba uye haazunguziki.

²⁴Mwoyo waro wedombo hautyi sokuoma kwakaita guyo.

²⁵Parinosimuka kunyange vakasimba[35] vanotya parinobvundura.

²⁶Bakatwa rinorisvika harina charinoriita kunyange pfumo kana museve kana pfumo zvaro renzeve.

²⁷Simbi rinoiita samashanga ndarira sehuni yakaora.

²⁸Miseve hariiti kuti ritize, matombo erekeni akaita sehundi kwariri.

²⁹Tsvimbo kwairi yakaita seshanga. Rinotoseka zvaro kungwerengwedza kwamapfumo.

³⁰Pasi paro pakaita sezvimedu zvepoto zvakapinza. Rinoti kwandekwande pamadhaka sechirhei chokupurisa.

³¹Rinoita kuti pasi pasi pavire sehari uye gungwa sepoto yamafuta.

³²Rinosia mushure maro mutsetse wemvura wakachena; ungafunge kuti hwenje hune mvere.

³³Panyika hapana chakafanana naro, chisikwa chisingatyi.

³⁴Rinozvidza chinhu chiri chose chakakura ndimambo wazvose zvinozvitutumadza.”