Read Bhaibhiri Idzva rechiShona Jobhu 5 Bible Online

Jobhu 5 - Bhaibhiri Idzva rechiShona bible

Jobhu 5

¹Chidanidziraka tione kana pane achakupindura ipapa ndiani pakati pavatsvene wauchazemberana naye?

²Kuzvidya mwoyo kunouraya munhu kuya, kushatirwa kunouraya marema.

³Ndakamboona ini benzi richidzika midzi. Pakarepo ndakati nzvimbo yake iwirwe norushambwa.

⁴Zvokugarika kwavana vake hapana, padare mhosva ndeyavo chete, wokuvamiririra panenge pasina.

⁵Zvaanokohwa zvichadyiwa zvazvo navane nzara vachizvitora kunyange mukati meminzwa, vane nyota vachitozvitsvira mwoyo.

⁶Uipi haumeri pavhu nhamo hainyuki pasi.

⁷Munhu ndiye anotozviparira, sezvinoita shiri ndidzo dzinotobhururuka mudenga.[5]

⁸Kana ndirini changu kutsvaka Mwari zvose zvinondinetsa ndozviturira kuna Mwari.

⁹Anoita zvinhu zvikuru zvisingabatiki zvinhu zvinoshamisa zvisingaverengeki.

¹⁰Anonaisa mvura panyika anotuma mvura paminda.

¹¹Anosumudzira pamusoro vanozvidukupisa vanochema anovasimudzira mwoyo norufaro

¹²anokangaidza mazano avane ujarijari kuti zvavanobata zvisabudirire.

¹³Anobata vakachenjera muujarijari hwavo, zvirongwa zvavanyengedzi hazvitani kushaiswa basa.

¹⁴Vanosangana naro rima zuva rakacheka nyika, vagoputaira masikati machena sokunge usiku.

¹⁵Asi anonunura varombo[6] pamiromo yavo navasina chavanacho mumaoko avane simba.

¹⁶Nokudaro varombo vanowana chitarisiro vezvekushaisa vanhu ruenzaniso vachimbopfumbirawo muromo.

¹⁷Zvake munhu anotsiurwa naMwari saka usazvidze shamhu yaSamasimba.

¹⁸Anoruma achifuridzira, anokuvadza zvake asi maoko ake anorapa.

¹⁹Achakununura kunhamo runosvika rutanhatu rwose kechinomwe aka hapana nyatwa inozokubatabata.

²⁰Panguva yenzara achakununura kurufu panguva yehondo achakununura kusimba rebakatwa.

²¹Achakuvanza kunhamo yavanotuka nomuromo. Hauchazotya kuparadza kana kwauya.

²²Zvokuparadza nenzara uchazviseka zvikara zvenyika hauzombozvitya.

²³Nokuti unenge une usahwira nematombo uye uchinzwanana nezvikara zvesango

²⁴uchaziva kuti patendhe pako hapana njodzi, uchaongorora danga rako ugoona kuti hapana chisipo.

²⁵Uchazvionawo kuti zvizvarwa zvako zvichawanda zvizukuru zvigoita souswa hwenyika.

²⁶Uchasvika kuguva kwako wanyatsokwegura zvako. Sezvinoita tsanga yechisote chembesanwa inouya pokupurira panguva yayo.

²⁷Vedu wee izvi takazvitsvaka, ndezvechokwadi. Teererai muzvizive kuti zvinokubatsirai.