Read Bhaibhiri Idzva rechiShona Jobhu 6 Bible Online

Jobhu 6 - Bhaibhiri Idzva rechiShona bible

Jobhu 6

¹Jobhu akapindura achiti,

²“Dai kuungudzika kwangu kwaierwa! Dai nyatwa yangu yose yaiiswa muzviero.

³Yaitorema kupinda jecha regungwa. Pamwe ndokusaka mazwi angu arasikawo gwara.

⁴Miseve yaSamasimba yakabairira mandiri mweya wangu unonwa chepfu yawo. Kutyisa kwaMwari kwanangana neni.

⁵Mbizi kana ine uswa inokuma here? Mombe inokuma here yakatarisa uswa?

⁶Chinhu chisinganake chingadyike here chisina munyu? Ko chichena chezai chinonzwika kunaka here?

⁷Ndozvine kudya kuri mukanwa mangu kudya kunondisemesa.[7]

⁸Dai zvangu ndaingowana zvandinokumbira. Dai Mwari aingondipawo zvandinosuwira.

⁹Dai zvaibvira kuti Mwari andiparadze. Andirove zvake andipedzisise zvake.

¹⁰Izvi ndizvo zvaitondinyaradza ndaitopembera kufara mukurwadziwa kusina tsitsi nokuti handina kuramba ini mashoko aiye mutsvene.

¹¹Iro simba rangu nderipi zvaro zvokuti ndivi nomwoyo murefu? Iwo mugumo wangu chiiwo zvawo kuti ndiuitire mwoyo murefu kudaro?

¹²Iro simba rangu rakafanana nesimba ramatombo here? Kana kuti nyama yangu yakaita sendarira here?

¹³Chokwadi mandiri hamuna chimuko, kana chokubata chaicho hapana.

¹⁴Munhu anorega kunzwira tsitsi kushamwari yava kurasa mwoyo anofuratira kutya Mwari.[8]

¹⁵Hama dzangu dzakandinyengedza samapopopo dzakaita somunoerera nemvura munozooma.

¹⁶Pasi perwizi panosvibira nemvura yakadzika inobva kuchando rwakafukidzwa namapopo emvura inobva kuchando chinonyungudika.

¹⁷Panguva yamadziya inonyangarika. Kana kwapisa chinonyangarika panzvimbo pawo ipapo.

¹⁸Dungwerungwe revenzendo rinotsaukira mvura, rinotetereka naro gwenga richitsakatika.

¹⁹Dungwerungwe revenzendo revokuTemani rinoitsvaka. Nedungwerungwe renzendo revokuShebha ndipowo pavanenge vakaisa mwoyo.

²⁰Vanorwadziwa mwoyo nezvavanenge vakatarisira vanosvika vobva vangosvipa mwoyo. Mazwi akaomarara aJobhu.

²¹“Ndizvo zvamave kwandiri maona kutambura kwangu mukabva matya.

²²Ndamboti ndipei chinhu here ini kana kuti mundiripire pfumbamuromo,

²³kana kuti mundinunure mumaoko omuvengi kana kuti mumaoko avanondidzvinyirira?

²⁴Dai muchitondidzidzisa ndainyarara zvangu muchindiratidzaka pandakakanganisa.

²⁵Harisi simba iroro rina mazwi ari pachokwadi, zvino iko kutsiura kwenyu uku kunotsiureiko?

²⁶Munongoda zvokukakavara namashoko chete nhai muchitora mazwi okurasa mwoyo sechinhu pasina?

²⁷Inga mungatoitira nherera chin'ange imi muchitoitirana nharo dzomutengo, kutengesa shamwari.

²⁸“Zvino chimbonyatsonditarisai muone, ndiri munhu here ini angareva nhema pamberi penyu?

²⁹Sandukai musiyane nezvisiri izvo. Chitosandukai zvenyu nokuti hunhu hwangu hwavakuita sechinhu pasina.[9]

³⁰Pane zvandakanganisa here mukutaura kwangu? Imo mukanwa mangu mungatadze here kunzwa kuti izvi zvinhu zvinonaka?”