Read Bhaibhiri Idzva rechiShona Jobhu 7 Bible Online

Jobhu 7 - Bhaibhiri Idzva rechiShona bible

Jobhu 7

¹Mazuva omunhu panyika haasi mazuva okushanda zvakaomarara here? Mazuva ake haana kuita here samazuva omushandi?

²Senhapwa inosuwira mumvuri, uye somushandi anosuwira mubayiro?

³Saizvozvo ndakatemerwa mwedzi yandisina chokuita nousiku hwokungotambura ndihwo hwandakapiwa.

⁴Ndikarara pasi, ndinenge ndichingoti ndichamuka rinhi? Asi usiku hwakareba ndinongoshanyarika kusvikira kwoedza.

⁵Muviri wangu unongova honye dzoga uye tsvina, ganda rangu rinongoti kakata kuoma pedzepo urwa puti.

⁶Mazuva angu anenge chivhimbo chomuruki kumhanya anopera pasina chitarisiro.

⁷Yeukai kuti upenyu hwangu hwakaita sefemo. Ziso rangu, zvakanaka, harichazombozvioni.

⁸Ziso riri kundiona, harichazondionizve, muchanditarisa asi ndichange ndisisipo.

⁹Sokumwararika kunoita gore richinyangarika, munhuwo anoenda kunzvimbo yavafi haadzokeko.

¹⁰Haadzoke kumba kwake nzvimbo yake haizombomuzivazve.

¹¹Naizvozvo handimborega kutaura ndichangotaura chete mukushungurudzika mwoyo kwangu ikoko. Ndichanyunyuta mukurwadziwa mwoyo kwangu.

¹²Ko ndava gungwa here ini kana kuti zigaranyanya romugungwa zvomondiisira vokundigaririra kudai?

¹³Pandinenge ndoti aiwa mubhedha wangu wombondipawo kakuzorora, sofa rangu rimboyerura kugurukuta kwangu,

¹⁴ndipo pamunotondityisidzira muhope muchindivhundutsa nezviratidzo

¹⁵zvokuti ndinosarudza kudzipwa zvangu kana kufa pane kuva nomuviri wangu uyu.

¹⁶Ndavakutovenga upenyu hwangu; zvokugara nokusingaperi handichadi. Siyanai neni, nokuti mazuva angu akangoita sefemo.

¹⁷Munhu chiiwo zvake zvamunotomusimudzira pamusoro kudaro, munhu zvake zvamunotomufungawo kudaro,

¹⁸zvamunomushanyira mangwanani oga oga muchimuedza nguva iri yose?

¹⁹Uko kundiringisa mucharegawo rinhi? Kana kumbondipawo kanguva kokumedza mate?

²⁰Kana ndikapara zvangu chitadzo chachinokuitai chii chaizvo, nhai imi mutarisi wavanhu? Ko maramba mangoti neni nangananga sei? Nemhaka yei ndave mutoro kwamuri?

²¹Munorega nei kundiregererawo chitadzo changu muchindibvisirawo uipi hwangu? Nokuti pari zvino ndicharara muvhu muchanditsvaka asi ndinenge ndisisiri chinhu.