Read Bhaibhiri Idzva rechiShona Jobhu 8 Bible Online

Jobhu 8 - Bhaibhiri Idzva rechiShona bible

Jobhu 8

¹Mhinduro yaBhiridhadhi. Ndipo pakazopindurawo Bhiridhadhi muShuhi achiti,

²“Ucharamba uchitaura uchidai kusvikira riniko, mashoko ako achinge dutu remhepo kudaro?

³Mwari angaite zvisina ruenzaniso here? Samasimba angaite zvisina kururama here?

⁴Kana vana vako vakamutadzira akavaisaka mujambwa rokutadza kwavo.

⁵Ukatsvaka Mwari uchinamata kuna iye Samasimba,

⁶kana uri mutsvene wakarurama, anotokusimukira achikupa mubayiro wopokugara pakanaka.

⁷Kutangisa kwako kungave kuduku zvako asi kumagumo kwazvo zvichava zvikuru.

⁸“Chimbobvunzawo zvako zvizvarwa zvakapfuura, umborangarira zvakaonekwa namadzibaba.

⁹Nokuti isu tiri vazuroka isu, zvatinoziva hapana nokuti mazuva edu panyika akangofanana nomumvuri.

¹⁰Havangakudzidzise here vachitaura mazwi anobva mukunzwisisa kwavo?

¹¹Idzo nhokwe dzingakure nhai pasina machakwi, tsanga dzingaite zararira here pasina mvura?

¹²Zvichina maruva hazvo uye zvisina kuchekwa zvinotangira zvimwe zvinomera kuuna.

¹³Ndiro gwara ravose vanokanganwa Mwari chitarisiro chaasiri munamati chinoparara.

¹⁴Chivimbo chake chinoita chimwandamwanda, chaanovimba nacho imba zvayo yebuwe.

¹⁵Anozendama paimba yake iyoyo asi kumira haimiri, anoti mbunde nayo asi haimiri.

¹⁶Muzuva anokasira kwazvo kukura achipasa kwazvo nhungiro mubindu rake rose.

¹⁷Midzi yake inomonererana namatombo kusvika paruware.

¹⁸Anogara pakati pamabwe kungodzurwa chete panzvimbo pake panoti hatimbokuziva

¹⁹Ndirwo chete rufarowo rwaanowana dzimwe dzinokura panyika dzotora nzvimbo yake.

²⁰“Chinzwa, Mwari haarasi munhu asina mhosva. Iye haaitiwo ushamwari navanoita zvakaipa.

²¹Achakupa tsetswa zvokutoseka zvako. Nomuromo wako uchiita chikwee kuseka.

²²Vanokuvenga vachazara nenyadzi. Tende ravaipi panenge pasisina.”