Read Bhaibhiri Idzva rechiShona Jobhu 9 Bible Online

Jobhu 9 - Bhaibhiri Idzva rechiShona bible

Jobhu 9

¹Mhosva dzomunhu kuna Mwari. Zvino Jobhu akazopindurawo achiti:

²“Ichokwadi ndinoziva kuti ndizvo, ko munhu angazviti akarurama sei pamberi paMwari?

³Dai kuri kuti munhu anoda kukakavadzana naMwari munhu haimbokwanisa kumupindura muchuru chamazana chezvinoda kutaurwa.

⁴Mwari anoungwaru mumwoyo make ane simba guru guru. Ndiani angamirisana naye akabudirira?

⁵Iye Mwari anosudurutsa makomo, iwo asingambozviziva, paanoakudubura nehasha.

⁶Iye anondengendengesa nyika achiibvisa panzvimbo payo, misimboti yayo ichizunguzika.

⁷Anotaurira zuva kuti rirege kubuda iro richitorega kubuda nyenyedzi achidzikwidibira.

⁸“Ndiye chete akatatamura denga achitsokodzera[10] masaisai egungwa.

⁹Ndiye akasika nyenyedzi idzi dzinoti, hweva, nechinyamutatu, nechinyamutanhatu nenyenyedzi dzokuMaodzanyemba.

¹⁰Anoita zvinhu zvikuru zvisingabatiki zvinhu zvinoshamisa zvisingaverengeki.

¹¹Tarisai muone anondipfuura napapa asi handimuoni anouya napandiri asi handizvioni.

¹²Hamuone kuti anogona kubvuta asi angamurambidze hapana. Ndiani angamuti chii chauri kuita?

¹³Mwari haachadzoka pahasha dzake kunyange vabatsiri vaRahabhu[11] vakatokotama pasi pake.

¹⁴“Zvino iniwo zvangu ndingamupindurewo ndichiti kudii, ndopandingasarudzawo here ini mazwi okukakavadzana naye?

¹⁵Kunyange ndisina mhosva handikwanisi kumupindura. Ndinotofanira kuteterera kuitirwa tsitsi naiye anondipa mhosva.

¹⁶Kunyange zvangu ndikamudaidza akadavira handifunge kuti anomboteerera zvandinotaura.

¹⁷Anotondipwanya-pwanya nedutu remhepo anotondivirikidza maronda pasina chikonzero.

¹⁸Haambondipa nguva yokutura mafemo asi anotondizadza neshungu dzinorwadza.

¹⁹Kana kuri kumumanikidza, ungamanikidze Mwari here? Kana kuri kukwira dare, ungakwidze Mwari dare here?

²⁰“Kunyange ndakarurama muromo wangu pachangu unondipa mhosva. Kunyange ndisina mhosva anondibata nemhosva.

²¹Handina zvangu mhosva asi handichisina hanya nezvandiri ndava kutosema upenyu hwangu.

²²Naizvozvo chimwechete chandinotaura ndechokuti anoparadza vasina mhosva navaipi.

²³Kana nyatwa ikayerekana yauraya munhu anotoseka zvake jambwa romunhu wakanaka.

²⁴Nyika yakaiswa mumaoko avaipi, Mwari akazarira maziso avatongi vayo kana asiri iye anoita izvozvi ndiani ari kuzviita?

²⁵“Mazuva angu anomhanya kupinda mumhanyi anomhanya zvikuru, anotiza pasinawo chakanaka chaanoona.

²⁶Anoyerera zvawo sehwato hwetsanga segondo ravakundohatura nyama yaro.

²⁷Ndikati regai ndichikanganwa zvangu kunyunyuta kwangu ndisiyane nokuva nouso hwakati surududu ndive ndinonyemwerera,

²⁸ndinongoramba ndichitya nhamo dzangu dzose. Ndinoziva kuti hamumbonditi ndiri munhu wakanaka.

²⁹Ndiri munhu anonzi ane mhosva chandinotamburira zvisina maturo chii zvangu?

³⁰“Kana ndikashamba zvangu nemazaya echando akanyungudika, kana ndikashamba maoko angu nesoda,

³¹munotondikanda mundove ndigosemwa nembatya dzangu.

³²Nokuti Mwari haasi munhu seni wandingagonewo zvangu kupindura zvokuti ndingamirisanewo naye mudare.

³³Hapana angatienzanisire nyaya yedu anogona kubata-bata kumativi ose.

³⁴Ngaarege kuti mubadha wake uve pandiri, kumutya zvikuru ngakurege kundisokosa,

³⁵ipapo ndingataure ndisingamutyi nokuti ndinoziva kuti hazvisizvo zvandiri.”