Read Bhaibhiri Idzva rechiShona Nziyo 10 Bible Online

Nziyo 10 - Bhaibhiri Idzva rechiShona bible

Nziyo 10

¹Ko munomirireiko kure nhai TENZI? Ko munozvivanzireiko panguva yenhamo?

²Munhu wakaipa anototi sika sika zvake kudzingirira murombo. Itai kuti vabatwe nemisungo yavakazviteera

³nokuti munhu akaipa anotozvirovera dundundu havi dzake. Munhu ana makaro anoshonha nokuramba TENZI.

⁴Munhu wakaipa, nokuzvikudza kwake, muna zvose zvaanofunga haana basa naTENZI, anoti, “Hakuna Mwari.”

⁵Zvose zvaanoita zvinobudirira. Matongero enyu ari kure naye; ari kokoko kumusoro kure naye; kana zviri zvavavengi vake, anovasinamisira uso.

⁶Anozviti nechomumwoyo, handimbotsukunyuki, pazvizvarwa zvose hapana chinondiwana.

⁷Kurengerera rushambwa, nounyengedzi nokutyisidzira zvinogara zviri pamuromo pake. Rurimi rwake nderwomusikanzwa nouipi.

⁸Anohwandira mumamisha achiuraya vasina mhosva muchivande; maziso ake anonyatsotarisa vanenge vawiramo;

⁹anonyangira muchivande seshumba; anonyangira kuti abate varombo; anobata murombo kana amukwevera mumambure ake.

¹⁰Vanenge vawira, vanopwanyiwa vachitoti mvuchata pasi pamusana pesimba rake.

¹¹Anofunga kuti Mwari anokanganwa; anozarira maziso ake; haambondioni.

¹²Simukai, TENZI Mwari simudzai ruoko rwenyu regai kukanganwa vatamburi.

¹³Chii chinopa kuti wakaipa ashore Mwari, achizviti, mumwoyo make, Mwari haandiripise.

¹⁴Imi munoona zvenyu, hongu matambudziko nenhamo munozviona; munozvibata kuti muzotsividza noruoko rwenyu, nherera dzinozviisa mumaoko enyu imi mubatsiri wenherera.

¹⁵Tyorai simba roruoko rwowakaipa nomutadzi uipi hwake hutsvakei kusvikira pasisina.

¹⁶TENZI ndimambo nokusingaperi, vechirudzi vachaparara munyika make.

¹⁷TENZI imi muchanzwa chichemo chavarombo. Muchavasimbisa mwoyo muchivarerekerera nzeve yenyu

¹⁸kuti muitire nherera navatamburi ruenzaniso kuitira kuti munhu akabva zvake kuvhu arege kutyisa.