Read Bhaibhiri Idzva rechiShona Nziyo 102 Bible Online

Nziyo 102 - Bhaibhiri Idzva rechiShona bible

Nziyo 102

¹Munamato womunhu wevechidiki munhamo Inzwai munamato wangu, imi TENZI, kuchema kwangu ngakusvike kwamuri.

²Musandivanze uso pazuva rokutambura kwangu. Rerekerai nzeve yenyu kwandiri; ndipindureiwo nokukasira pazuva randinodanidzira.

³Mazuva angu ari kupfuura soutsi uye mapfupa angu anopisa sevirira romoto.

⁴Mwoyo wangu wasvaviswa, wauna souswa, ndava kutokanganwa kudya chokudya.

⁵Pamusana pokuungudza kwangu kukuru, mapfupa angu avakutoomererana nenyama yangu.

⁶Ndavakunge zizi romurenje, sezizi romudongo chaimo.

⁷Ndinorara ndakasvinura, ndavakunge shiri iri yoga pamusoro pemba.

⁸Ndinoshorwa navavengi vangu zuva rose; vanondiseka vanoshandisa zita rangu sechinhu chokurengerera nacho rushambwa.

⁹Nokuti ndinodya dota sechingwa, ndichisanganisa chokunwa changu nemisodzi

¹⁰pamusana pokutsamwa kwenyu nehasha nokuti makanditora mukandikanda kwakadaro.

¹¹Mazuva angu akaita somumvuri wamanheru, ndinouna souswa.

¹²Asi imi mugere pakutonga nokusingaperi, zita renyu richaramba riripo kuzvizvarwa nezvizvarwa zvose.

¹³Muchasimuka henyu monzwira ngoni guta reZioni, iri nguva yokurinzwira tsitsi, nguva yakatemwa inenge yasvika

¹⁴nokuti varanda venyu vanoda matombo aro uye vanorinzwira tsitsi kunyange rava guruva.

¹⁵Marudzi achatya zita raTENZI uye madzimambo apasi acharemekedza mbiri yenyu.

¹⁶Nokuti TENZI achavakazve guta reZioni, achazviratidza nembiri yake.

¹⁷Achanzwa munamato wavasina chavanacho, asingashairi hanya mukumbiro wavo.

¹⁸Izvi ngazvinyorerwe chizvarwa chinouya kuitira kuti vanhu vasati vazvarwa varumbidze TENZI;

¹⁹kuti akatarira pasi ari munzvimbo yake yokumusoro inoera. TENZI akatarisa pasi ari kudenga

²⁰kuti anzwe kugomera kwavasungwa kuti asunungure vakanga vatongerwa rufu,

²¹kuri kuitira kuti vanhu vaparidze zita raTENZI muZioni, vaparidze mbiri yake muJerusaremu,

²²marudzi avanhu paanoungana pamwechete, nyika nenyika padzinoungana kuzonamata TENZI.

²³Akandityora mapfupa panzira; akandidimurira mazuva.

²⁴Ndinoti, Mwari wangu musanditore ndichiri mukati memazuva angu, imi mune makore anoramba aripo pazvizvarwa nezvizvarwa zvose.

²⁵Pasi chigare, makaisa ugaro hwenyika, matenga ibasa ramaoko enyu.

²⁶Izvo zvichaparara asi imi mucharamba muripo; zvichasakara sehanzu. Munovachinja sehembe vachipfuura.

²⁷Asi imi munoramba muri zvamuri makore enyu haaperi.

²⁸Vana vavaranda venyu vachagara zvisina njodzi; zvizukuru zvavo zvichanyatsodzika midzi pamberi penyu.