Read Bhaibhiri Idzva rechiShona Nziyo 103 Bible Online

Nziyo 103 - Bhaibhiri Idzva rechiShona bible

Nziyo 103

¹Rwiyo rwaDhavhidhi. Rumbidza TENZI iwe mweya wangu uye zvose zviri mandiri, rumbidzai zita rake rinoera.

²Rumbidza TENZI iwe mweya wangu; usakanganwe zvikomborero zvake zvose.

³Iye anoregerera uipi hwako hwose; anokurapa zvirwere zvako zvose

⁴anokununura kuti urege kuenda kuguva. Pamusoro pazvose anokuitira mwoyochena netsitsi.

⁵Anokugutsa nezvinhu zvakanaka upenyu hwako hwose achikugwinyisa zvokuti unoramba uri mudiki segondo.

⁶TENZI anomiririra nokuitira zvino ruenzaniso vose vanodzvinyirirwa.

⁷Akazivisa nzira dzake kuna Mosesi namabasa ake kuvanhu veIsiraeri.

⁸TENZI ane tsitsi nengoni haakurumidzi kushatirwa uye ane mwoyochena wakawanda.

⁹Haarambi achingotsiura kana kuramba akashatirwa.

¹⁰Haatiitiri zvakaenzana nezvitadzo zvedu kana kutipa mubayiro maererano nouipi hwedu.

¹¹Sokukwira kwakaita denga kubva pasi ndokukura kwakaita mwoyochena wake kuna vanomutya.

¹²Sokutaramukana kwakaita kumabvazuva nokumadokero ndokutaramutsa kwaanoita zvikanganiso zvedu kubva kwatiri.

¹³Sezvinoita baba kunzwira tsitsi vana vavo, TENZI anoitirawo tsitsi vanomutya

¹⁴nokuti anoziva maumbirwo atakaitwa anoyeuka kuti tiri huruva.

¹⁵Asi munhu mazuva ake akaita souswa anokura seruva romusango.

¹⁶Mhepo inongoti pfuurei napariri irowo hutu kuenda, nzvimbo yaro haizomboriziva.

¹⁷Asi mwoyochena waTENZI uripo narini narini kuna vanomutya uye ururami hwake hunosvika kuvana vavana

¹⁸kuna vanochengeta chitenderano chake uye vanoyeuka kuchengeta mitemo yake.

¹⁹TENZI akaisa chigaro chake chokutonga mudenga, umambo hwake hunotonga zvose.

²⁰Rumbidzai TENZI imi vatumwa vake vose, imi magamba munoita zvaanoreva muchiteerera izwi rake.

²¹Rumbidzai TENZI imi hondo dzake dzose dzokudenga imi vashandi vake vanoita kuda kwake.

²²Rumbidzai TENZI imi mabasa ake ose kose kwaanotonga. Rumbidza TENZI iwe mweya wangu.