Read Bhaibhiri Idzva rechiShona Nziyo 104 Bible Online

Nziyo 104 - Bhaibhiri Idzva rechiShona bible

Nziyo 104

¹Rumbidza TENZI mweya wangu TENZI Mwari wangu muri mukuru kwazvo, makapfeka chiremera nembiri.

²Imi munozvifukidza nechiedza sehanzu, imi makatambanudza denga setendhe.

³Imi makamisa mbiru dzedzimba dzenyu pamvura, munoita makore ngoro dzenyu dzehondo, munofamba muri pamapapiro emhepo.

⁴Munoita kuti mhepo dzive nhumwa dzenyu muchiita moto namarimi vashandiri venyu.

⁵Makamisa nyika paugaro hwayo kuti irege kumbozunguzwa.

⁶Makaifukidza nemvura yakadzika sehanzu mvura yaifukidza makomo zvokutoapfuurira.

⁷Pamakaitsiura, mvura yakabva yatiza, payakangonzwa kutinhira kwenyu yakatiza.

⁸Yakayerera pamusoro pamakomo ichienda mumapani kunzvimbo yamakaitemera.

⁹Makaimisira miganhu yaisingafaniri kupfuura kuti irege kufukidzazve nyika.

¹⁰Makaita kuti zvisipiti zvitubuke mumapani, mvura ichiyerera pakati pamakomo.

¹¹Zvinopa mvura yokunwa kumhuka dzose dzesango, mbizi dzichitopedzawo nyota yadzo.

¹²Shiri dzinoita matendere adzo munyasi mayo, dzinoimba mumapazi.

¹³Munodiridza makomo muri kumusoro kwamunogara. Nyika inogutswa nemichero yebasa renyu.

¹⁴Munokudzira mombe uswa uye mbeu dzokuti munhu arime kuitira kuti aburitse zvokudya muvhu

¹⁵newaini yokufadza nayo mwoyo womunhu namafuta okuti apenyese uso hwake nawo nechingwa chokusimbisa mwoyo womunhu nacho.

¹⁶Miti yaTENZI inodiridzwa zvikuru; miti yemisidhari yeRebhanoni yaakasima.

¹⁷Mairi, shiri dzinovaka matendere adzo shuramurove mumasaipurasi ndimo mumusha maro.

¹⁸Makomo marefu ndeembudzi dzomusango mumatombo ndimo munovanda mbira.

¹⁹Makaita mwedzi kuti utare mwaka; zuva rinoziva nguva yokudoka.

²⁰Munoita kuti kuite rima huchibva hwava usiku. Mhuka dzose dzesango ndipo padzinobva dzabuda.

²¹Shumba dzechidiki dzinodzvovera chokudya dzichitsvaka chokudya chadzo kuna Mwari.

²²Kana zuva rabuda dzinobva dzondorara munzvimbo yadzo.

²³Munhu anobudawo achienda kubasa rake, kumushando wake kusvikira manheru.

²⁴TENZI hakusi kuwanda ikoko kwakaita zvamakaita, makazviita zvose noungwaru nyika izere nezvisikwa zvenyu.

²⁵Ukowo uko hero gungwa rakakura uye rakapamhama rinebvakapfaka rezvinhu zvisingaverengeki, zvinhu zvipenyu zvidiki nezvikuru.

²⁶Uko heyo ngarava iri kufamba nezigaranyanya ramakasika kuti mutambe zvenyu naro.

²⁷Zvose izvozvi zvinotarisa kwamuri kuti muzvipe zvokudya zvazvo nenguva kwayo.

²⁸Zvamunozvipa ndizvo zvazvinounganidza, mukatambanudza ruoko rwenyu izvo zvinobva zvagutswa nezvinhu zvakanaka.

²⁹Mukangovanza uso hwenyu, izvo zvinobva zvadumbirwa. Mukabvisa femo razvo zvinobva zvafa zvichibva zvadzokera kuvhu kwazvo.

³⁰Mukatuma mweya wenyu zvinobva zvasikwa, muchitobva mavandudza pasi.

³¹Mbiri yaMwari ngaigare nokusingaperi Mwari ngaafarire mabasa ake;

³²iye anoti akatarisa pasi, panobva pandengendeka, akabata makomo, anobva apwititika utsi.

³³Ndichaimbira TENZI upenyu hwangu hwose. Ndichaimba ndichirumbidza Mwari wangu ndiri mupenyu.

³⁴Dai waro munamato wangu wokurangarira kwangu kwangomufadza nokuti ndinofara naMwari.

³⁵Vatadzi ngavaparadzwe panyika vakaipa ngavarege kuzovapozve. Rumbidza TENZI iwe mweya wangu TENZI ngaarumbidzwe.