Read Bhaibhiri Idzva rechiShona Nziyo 105 Bible Online

Nziyo 105 - Bhaibhiri Idzva rechiShona bible

Nziyo 105

¹Tendai TENZI mumunamate nezita, muparidze mabasa ake kundudzi dzavanhu.

²Muimbirei mumurumbidze nenziyo mutaure zvishamiso zvaakaita.

³Pururudzai muzita rake rinoera; mwoyo yavanotsvaka TENZI ipembere nokufara.

⁴Nekairai kutsvaka TENZI mutsvakewo simba rake. Shungu yokuda kuva pana TENZI ngaive mugariro.

⁵Rangarirai zvishamiso zvaakaita zviratidzo nemirao yakabuda mumuromo make.

⁶Imi chizvarwa chaAbhurahamu, muranda wake, imi vana vaJakobho, vasarudzwi vake.

⁷Iye TENZI ndiye Mwari wedu, mirao yake hakuna kwaisiri pasi pose.

⁸Anorangarira nokusingaperi chitenderano chake, chitsidzo chaanochengeta kusvikira kuchizvarwa chechiuru.

⁹Chitenderano chaakaita naAbhurahamu chitsidzo chaakaita kuna Isaki

¹⁰chaakazvisunga nacho somurao kuitira Jakobho sechitenderano chake navaIsiraeri chokugara nokugara

¹¹achiti, “Ndichakupa nyika yeKanani somugove wako wenhaka.”

¹²Ipapo vakanga vachiri katsama chete, vanhu vashomanana, vatorwa zvavo,

¹³kufamba nawo marudzi akasiyana siyana vachideva namo mumadzimambo nomumarudzi avanhu vakasiyana siyana.

¹⁴Zvokuti pave navanovadzvinyirira, akaramba, pamusana pavo aitsiura madzimambo,

¹⁵achiti, “Musambobata-bata zvenyu vangu vandakazodza, vaporofita vangu musawana chamunoita kwavari.”

¹⁶Paakatuma nzara panyika akaparadza chose chinonzi chokudya.

¹⁷Akafanotuma mumwe murume pamberi pavo ainzi Josefi akatengeswa somuranda.

¹⁸Makumbo akati ngaasungwe akaiswa makechemu, mutsipa wake wakakochekerwa nesimbi.

¹⁹Kusvikira zvaakanga ataura zvaitika, shoko raTENZI rakamupembedza.

²⁰Mambo akatuma shoko akamusunungura mutongi wavanhu akamusunungura.

²¹Akamuita mukuru mukuru womuzinda wake uye mutongi wezvinhu zvake zvose

²²achigona kupa machinda ake mutemo waanoda uye kudzidzisa vakuru kwaari ungwaru.

²³Isiraeri akazouya kuIjipiti Jakobho akambogara munyika yokwaHamu.

²⁴TENZI akaita kuti vanhu vake vaberekane zvikuru akavapa simba kupinda vatongi vavo

²⁵vaakasandura mwoyo kuti vavenge vanhu vake uye kuti vanyengedze varanda vake.

²⁶Akatuma Mosesi muranda wake naAroni waakasarudza

²⁷vakaita zviratidzo zvake pakati pavo nezvishamiso munyika yokwaHamu.

²⁸Akatuma rima akaita kuti nyika iite rima, ikati ndoo kusviba. Akapandukira zvaakanga areva.

²⁹Akasandura mvura yavo ikava ropa akauraisa hove dzavo.

³⁰Nyika yavo yakazara matafi kunyange mudzimba dzamadzimambo avo.

³¹Akataura kukauya mhute dzenhunzi neumhutu nyika yavo yose.

³²Panze pokuvapa mvura akavatumira chimvuramahwe nemheni yaipenya nyika yose

³³akaparadza migirepisi yavo nemionde yavo akatyoranisa miti yenyika yavo yose.

³⁴Akataura, hwiza dzikauya, gwatakwata radzo risingaverengeki.

³⁵Dzakadya zvinomera zvose munyika mavo dzikadya muchero weminda yavo.

³⁶Akauraya matangwe ose munyika mavo zvibereko zvokutanga zvesimba ravo rose.

³⁷Akabudisa vaIsiraeri vaine sirivha nendarama, hapana kana mumwe wavo aiva noundonda.

³⁸Ijipiti yakafara pavakaenda nokuti yakanga yawirwa nokuvatya kukuru.

³⁹Akatambanudza gore rokuvafukidza naro nomoto wokuvavhenekera nawo usiku.

⁴⁰Vakakumbira, iye akavaunzira zvihuta, akavapa chingwa chakawanda chaibva kudenga.

⁴¹Akazarura dombo mvura ikadzutuka ikayerera nomurenje serwizi

⁴²nokuti akayeuka chitsidzo chake chinoera naAbhurahamu muranda wake.

⁴³Naizvozvo akatungamirira vanhu vake norufaro vanhu vake vaakasarudza vakaimba nomufaro.

⁴⁴Akavapa nyika dzevechirudzi vakatora zvavo muchero webasa rakanga raitwa namarudzi avanhu

⁴⁵achiitira kuti ivo vazochengeta mirao yake nokuchengeta mitemo yake. Areruya.