Read Bhaibhiri Idzva rechiShona Nziyo 106 Bible Online

Nziyo 106 - Bhaibhiri Idzva rechiShona bible

Nziyo 106

¹Areruya. Tendai TENZI nokuti wakanaka nokuti mwoyochena wake hauperi.

²Ndiani angataure mabasa aTENZI esimba kana angaparidze mukurumbira wake?

³Vakakomborerwa zvavo vanoita zvino ruenzaniso; vanoita zvakarurama nguva dzose.

⁴Ndiyeukeiwo TENZI pamunoratidza vanhu venyu kuvada kwenyu. Ndiyamureiwo pamunovanunura

⁵kuti ndiwanewo kubudirira kwavasarudzwi venyu kuti ndifarewo panofara vanhu venyu. Ndigopemberawo nenhaka yenyu.

⁶Asi pamwechete namadzibaba edu takatadza. Takaita zvakaipa takaita zvisakarurama.

⁷Madzibaba edu paakanga ari muIjipiti havana kurangarira mabasa enyu anoshamisa. Havana kuyeuka kuita mwoyochena kwenyu kwakawanda asi vakatopandukira Wokumusorosoro paGungwa Dzvuku.

⁸Zvakadaro zvazvo akavanunura pamusana pezita rake kuti aratidze simba rake guru.

⁹Akakarira Gungwa Dzvuku rikava napakaoma; akavatungamirira napakadzika sokunge vaiva mugwenga.

¹⁰Nokudaro akavanunura mumaoko omuvengi akavaponesa kusimba remhandu.

¹¹Mvura yakafukidza vaivarwisa hakuna kana mumwechete wavo akasara.

¹²Ndipo pavakatenda mazwi ake vakaimba vachimurumbidza.

¹³Asi havana kutana kukanganwa mabasa ake; havana kumirira mazano ake.

¹⁴Asi vakaita makaro murenje, vakaedza Mwari mugwenga.

¹⁵Akavapa zvavakakumbira asi akavatumira denda rinoparadza.

¹⁶Vanhu pavakaitira Mosesi shanje pamatendhe naAroni mutsvene waTENZI.

¹⁷Nyika yakabamuka ikamedza Dhatani ikafukidza vechikwata chokwaAbhiramu.

¹⁸Moto wakabaka muchikwata chavo; rimi romoto rikapisa vakaipa.

¹⁹Vakaumba chimhuru kuHorebhu vakagwadamira chifananidzo chakaumbwa.

²⁰Mbiri yavaifanira kupa Mwari vakaipa kuchifananidzo chemombe inodya uswa.

²¹Vakakanganwa Mwari mununuri wavo akaita zvinhu zvikuru muIjipiti,

²²mabasa anoshamisa munyika yaHamu uye zvinhu zvinotyisa paGungwa Dzvuku.

²³Naizvozvo akati regai ndivaparadze pasina kuti Mosesi musarudzwi wake, akatovamiririra pamberi pake kuti adzore hasha dzake arege kuvaparadza.

²⁴Vakazvidza nyika yakanaka vasina chivimbo nezvaakatsidzira.

²⁵Vakanyunyuta mumatendhe avo havana kuteerera izwi raTENZI.

²⁶Nezvo akasimudza ruoko rwake akapika kuti vachatofira murenje imomo

²⁷uye kuti achamwararisa zvizukuru zvavo mukati mevechirudzi achivaita rumwe rumwe mudzinyika.

²⁸Vakazvibatanidza naBhaari wokuPeori vakadya zvibayiro zvakapirwa vakafa.

²⁹Vakavirutsa Mwari nehasha nezviito zvavo; denda rakamuka pakati pavo.

³⁰Fineasi ndiye akatozoipindira nyaya yacho, denda rikabva ramiswa.

³¹Izvozvo zvakaita kuti anzi mururami pachizvarwa nechizvarwa nokusingaperi.

³²Vakamushatirisa paya pamvura yokuMeribha zvikaipira Mosesi nokuda kwavo

³³nokuti vakamusvibisa mwoyo akataura zvisina maturo nomuromo wake.

³⁴Havana kuparadza marudzi avanhu sokuudzwa kwavakanga vaitwa naTENZI

³⁵asi vakavhengana namarudzi vakadzidza kuita zvavanoita.

³⁶Vakanamata zvifananidzo zvavo zvikava musungo kwavari

³⁷vakaita vana vavo vakomana navasikana chibayiro kumweya yakaipa.

³⁸Vakadeura ropa risina mhaka ropa ravanakomana vavo navanasikana vavo vavakapira kuzvifananidzo zvomuKenani nyika ikan'oreswa neropa.

³⁹Naizvozvo vakan'oreswa nezviito zvavo; vakaita unzenza nokuita kwavo.

⁴⁰Nezvowo TENZI akavirukira vanhu vake nehasha akavenga nhaka yake.

⁴¹Akavaisa mumaoko evechirudzi zvokuti vaivavenga vakavatonga.

⁴²Vavengi vavo vakavadzvanyirira, vakapinda uranda pasi pavo.

⁴³Akavanunura kazhinji asi ivo zvavaironga ndezvokupanduka bedzi, vakadzikira kwazvo pamusana pouipi hwavo.

⁴⁴Asi aiona nhamo yavo paakanzwa kuchema kwavo.

⁴⁵Akarangarira chitenderano chake navo achitoitira zvake ivo, akadzora mwoyo pamusana pokuwanda kwemwoyochena wake.

⁴⁶Akaita kuti vanzwirwe tsitsi navose vakanga vavatapa.

⁴⁷Tinunureiwo TENZI Mwari wedu mutikokorodze kumarudzi kuitira kuti titende zita renyu rinoera tifare nomukurumbira wenyu.

⁴⁸TENZI Mwari waIsiraeri ngaarumbidzwe narini narini vanhu vose ngavati, “Ameni.” Areruya.[48]