Read Bhaibhiri Idzva rechiShona Nziyo 107 Bible Online

Nziyo 107 - Bhaibhiri Idzva rechiShona bible

Nziyo 107

¹Tendai TENZI nokuti akanaka mwoyochena wake hauperi.

²Vakanunurwa naTENZI ngavadaro, vaakanunura munhamo,

³vaakakokorodza kubva kudzinyika, kubva kumabvazuva nokumadokero, kuchamhembe nokumaodzanyemba.

⁴Vamwe vakadzungaira murenje vachishaya nzira yokuenda nayo kuguta rokundogara.

⁵Vakaita nzara nenyota vakarasa mwoyo.

⁶Vakazochema kuna TENZI munhamo dzavo, iye akavanunura kupfumvu yavo.

⁷Akavatungamirira munzira yakati tasa vakasvika muguta rokugara.

⁸Ngavatende TENZI nokuda kwomwoyochena wake uye nokuda kwezviito zvake kuvanhu zvinoshamisa

⁹nokuti anogondwesa ane nyota uye ane nzara anomugutsa nezvinhu zvakanaka.

¹⁰Vamwe vaigara murima nomuzarima vari vasungwa vari munhamo vakasungwa nesimbi

¹¹nokuti vakanga vapandukira mazwi aMwari vakazvidza zano roWokumusorosoro.

¹²Vakanga vasvipa mwoyo nebasa rakaomarara vakawira pasi pasina anovabatsira.

¹³Vakazochema kuna TENZI munhamo dzavo, iye akavanunura mupfumvu yavo.

¹⁴Akavaburitsa murima nomuzarima akadambura misungo yavo.

¹⁵Ngavatende TENZI mwoyochena wake uye zviito zvake kuvanhu zvinoshamisa,

¹⁶nokuti anopwanya makonhi endarira achityora napakati zvihuri zvesimbi.

¹⁷Vamwe vakarwara nokuda kwokutadza kwavo, vakapinda pfumvu pamusana pouipi hwavo.

¹⁸Vakasema zvokudya zvose vakatenge voda kufa.

¹⁹Vakazochema kuna TENZI munhamo dzavo, iye akavanunura kupfumvu yavo.

²⁰Akavarapa nezwi rake akavanunura pakuparadzwa.

²¹Ngavatende TENZI mwoyochena wake uye zviito zvake kuvanhu zvinoshamisa.

²²Uye ngavapire chibayiro chokutenda vaparidze mabasa ake nenziyo dzorufaro.

²³Pane vamwe vakaenda kugungwa nengarava vachiita ushambadzi vari mumvura zhinji.

²⁴Vakaona zvinoita TENZI, zviito zvake zvinoshamisa makadzika.

²⁵Akataurira dutu kuti risimuke rikasimudza masaisai egungwa.

²⁶Vaimboti mudenga kata vozomboti pasi pasi vido pakadzika, vakapererwa nechivindi mujambwa ravo rakaipa.

²⁷Vakadzengedzeka vakadzadzarika savanhu vakadhakwa vapererwa nopfungwa.

²⁸Vakazochema kuna TENZI munhamo yavo iye akavanunura kupfumvu yavo.

²⁹Akanyaradza dutu, masaisai egungwa akabva apomhodzwa.

³⁰Vakabva vafara nokuti vakave norunyararo uye nokuti akavaunza pokumisa ngarava pavaida.

³¹Ngavatende TENZI mwoyochena wake uye zviito zvake kuvanhu zvinoshamisa.

³²Ngavamurumbidze mugungano ravanhu vamurumbidze musangano ravakuru vakuru.

³³Anosandura nzizi kuva gwenga zvisipiti zvomvura zvichiva ivhu rine nyota

³⁴nyika inobereka ichiva renje romunyu nechikonzero chouipi hwavagari vayo.

³⁵Anosandura gwenga richiva madziva emvura nyika yakaoma ichiva zvisipiti zvemvura.

³⁶Vanenzara vanotonoita musha ipapo vachitovaka guta rokugara

³⁷vachitodyara minda, vachitosima migirepisi vachiwana kukohwa kwakanaka.

³⁸Ivo pachavo aivakomborera vachitowanda kwazvo asingabvumiri kuti zvipfuwo zvavo zvishomeke,

³⁹kana vainge vashomekeswa, vaitwa vanhu vasina maturo pamusana pokudzvinyirirwa kana kuti nenhamo kana nokusuruvara.

⁴⁰Aizvidza machinda achiita kuti vadzengerere murenje

⁴¹asi anobvisa kunhamo vasina chavanacho achiwanza mhuri dzavo samatanga ezvipfuo

⁴²Vakarurama vanozviona vagofara; asi vakaipa vose vachati muromo kapu nazvo.

⁴³Munhu wose mungwaru ngaacherechedze zvinhu izvi vanhu ngavarangarire mwoyochena waTENZI.