Read Bhaibhiri Idzva rechiShona Nziyo 109 Bible Online

Nziyo 109 - Bhaibhiri Idzva rechiShona bible

Nziyo 109

¹Kunyunyuta kwomunhu ari munhamo Imi Mwari wandinorumbidza regai kunyarara

²nokuti vakaipa navarevi venhema vari kundirwisa vachindirevera nhema

³vandikomba namashoko oruvengo vachindirwisa pasina chikonzero.

⁴Vanondivenga kunyange zvazvo ini ndichivada asi ini ndichatovanamatira.

⁵Saizvozvo vanodzorera kuvada kwangu nezvakaipa uye rudo rwangu noruvengo.

⁶Sarudzai munhu wakaipa wokumupikisa, ngapave nomupomeri kurudyi kwake.

⁷Paanotongwa ngaabatwe nemhosva. Munamato wake ngautorwe sechitadzo.

⁸Mazuva ake ngaaite mashoma basa rake ngaritorwe nomumwe.

⁹Vana vake ngavave nherera dzisina baba mudzimai wake ave chirikadzi.

¹⁰Vana vake ngavadzungaire vachipemha ngavadzingwe mumatongo avanenge vagere vari.

¹¹Waakatorera chikwereti ngaamutorere zvose zvaanazvo, vatorwa ngavapambe zvaakashandira.

¹²Ngaparege kuva nomunhu anomunzwira tsitsi kana anonzwira tsitsi nherera dzake dzisina baba.

¹³Vana vake ngavaparadzwe, zita rake ripfudzike pachizukuru chechipiri.

¹⁴Zvakaipa zvamadzibaba ake ngazvirangarirwe naTENZI; chitadzo chaamai vake chirege kupfudzwa,

¹⁵zvirambe zviri pana TENZI kuitira kuti vasamboyeukwazve panyika.

¹⁶Nokuti haana kuyeuka kuita mwoyo wakanaka; asi akaronda varombo navasina chavanacho navakarasa mwoyo kusvikira vatofa.

¹⁷Aifarira kurengerera rushambwa, rushambwa ngarumupfukire. Haana kufarira chikomborero saka ngachivewo kure naye.

¹⁸Akapfeka kurengerera rushambwa sebhachi, dai kukamutotesa semvura, samafuta mumapfupa ake.

¹⁹Dai kukangoita sehanzu yaanozvimonera nayo uye sebhande raanozvisunga naro zuva nezuva.

²⁰Iwoyu ngauve mubayiro wavanondipa mhosva unobva kuna TENZI wavo vanotaura zvakaipa nezvangu.

²¹Asi imi Mwari TENZI wangu ndibatsirei pamusana pezita renyu nokuti mwoyochena wenyu wakanaka, ndinunureiwo

²²nokuti ndiri murombo asina chaanacho, uye ndabaiwa mwoyo.

²³Ndavakunyangarika somumvuri kumanheru ndazunzirwa pasi semhashu.

²⁴Mabvi angu arenda nokutsanya, ndaonda ini.

²⁵Ndava chinhu chinoshorwa navandipomera mhosva; vakandiona vanozunguza musoro.

²⁶Ndibatsireiwo TENZI Mwari wangu ndinunureiwo nemwoyochena wenyu.

²⁷Ngavazvizive kuti iri isimba renyu uye kuti imi TENZI ndimi makazviita.

²⁸Regai zvavo varengerere rushambwa asi imi komborerai vanondirwisa zvavo; asi vachanyara ini muranda wenyu ndichitofara.

²⁹Vanondipa mhosva ngavafukidzwe nokuzvidzwa. Ngavamoneredzwe nokunyara kwavo sejira.

³⁰Ndichatenda TENZI kwazvo nomuromo wangu ndichamurumbidza paruzhinji rwavanhu

³¹nokuti anomira naasina chaanacho kumununura kuna vanomutongera rufu.