Read Bhaibhiri Idzva rechiShona Nziyo 116 Bible Online

Nziyo 116 - Bhaibhiri Idzva rechiShona bible

Nziyo 116

¹Ndinoda TENZI nokuti akanzwa izwi rangu nechichemo changu;

²nokuti akarerekera nzeve yake kwandiri naizvozvo ndichadaidzira kwaari chero ndichiri mupenyu.

³Misungo yorufu yakandikomba, kurwadza kwenzvimbo yavakafa kwakandibata. Ndakaona nhamo namatambudziko.

⁴Ndakazodana zita raTENZI ndichiti, “Ndinokukumbirai TENZI ndinunureiwo.”

⁵TENZI wakanaka, akatendeka; Mwari wedu ane tsitsi.

⁶TENZI anochengeta vanhuwo zvavo. Pandakanga ndasakadzwa nenhamo, akandinunura.

⁷Mwoyo wangu dzikama zvako nokuti TENZI akandiitira zvakanaka

⁸nokuti makandinunura kurufu mukandipukuta misodzi mukanditsigira kuti ndirege kuwa.

⁹Saizvozvo ndinofamba ndiina TENZI munyika yavapenyu.

¹⁰Ndakaramba ndiine chitendero changu, kunyange ndaiti zvangu, “Ndiri kutambudzika zvikuru.”

¹¹Pandakanga ndazunzika kudaro ndakati, “Kuvimba nomunhu hakuna maturo.”

¹²Ko TENZI ndichamupeiko pane zvizhinji zvaakandipa?

¹³Ndichapira mukombe womuteuro woruponeso ndichidaidza zita raTENZI.

¹⁴Ndichaita zvandakatsidza kuna TENZI vanhu vake vose vachiona.

¹⁵Kuna TENZI, rufu rwavarurami vake rwakakosha.

¹⁶TENZI ini ndiri muranda wenyu. Ndiri muranda wenyu, mwanakomana womurandakadzi wenyu, makandinunura kurufu.

¹⁷Ndichapira kwamuri chibayiro chokutenda ndichinamata zita raTENZI.

¹⁸Ndichaita zvandakatsidza kuna TENZI vanhu vake vose vachizviona

¹⁹mumipanda yemba yaTENZI mukati mako iwe Jerusaremu. Areruya.