Read Bhaibhiri Idzva rechiShona Nziyo 118 Bible Online

Nziyo 118 - Bhaibhiri Idzva rechiShona bible

Nziyo 118

¹Tendai TENZI nokuti wakanaka, mwoyochena wake hauperi narini.

²Isiraeri ngaiti, “Mwoyochena wake hauperi narini.”

³Imba yokwaAroni ngaiti, “Mwoyochena wake hauperi narini.”

⁴Vanotya TENZI ngavati, “Mwoyochena wake hauperi narini.”

⁵Ndakadaidzira kuna TENZI ndiri munhamo, TENZI akandipindura akandipinza murusununguko.

⁶TENZI zvaari kudivi kwangu handityi, munhu angandiitei.

⁷TENZI zvaari kudivi kwangu somumwe wavabatsiri vangu, vanondivenga ndichatovayeva zvangu.

⁸Zviri nani kupotera kuna TENZI panokuvimba nomunhu.

⁹Zviri nani kupotera panaTENZI panokuvimba namachinda.

¹⁰Marudzi akandikomba, muzita raTENZI ndakavaparadza.

¹¹Vakandikomba zvokundikomberedza kwazvo mativi ose; muzita raTENZI ndakavaparadza.

¹²Vakandimomotera senyuchi vakati viru viru somoto wetsotso dzeminzwa; muzita raTENZI ndakavaparadza.

¹³Ndakasundidzirwa zvine simba zvokutoda kuwa asi TENZI akandibatsira.

¹⁴TENZI ndiye simba rangu norumbo rwangu, ndiye akava ruponeso rwangu.

¹⁵Heyo mheterwa nemipururu yokupururudzira kukunda zvinonzwika mumatendhe avarurami. Simba rorudyi rwaTENZI rakaita zvinogara zvakadaro.

¹⁶Simba rorudyi rwaTENZI rinosimudzira kukunda, simba rorudyi rwaTENZI rinoita zvinogara zvakadaro.

¹⁷Handimbofi asi ndichatorarama ndigorondedzera mabasa aTENZI.

¹⁸TENZI akandiranga zvinorwadza asi haana kunditsvitsa pakufa.

¹⁹Ndizarurireiwo mukana woururami kuti ndiwane pokupinda napo nditende TENZI.

²⁰Uyu ndiwo musuwo waTENZI; vakarurama vachapinda nawo.

²¹Ndinokutendai nokuti makandipindura mukava ruponeso rwangu.

²²Dombo rakarambwa navavaki ndiro rakazova dombo guru rapakona.

²³Uku kuita kwaTENZI, chinhu chinoshamisa.

²⁴Iri ndiro zuva rakaitwa naTENZI ngatifarei kwazvo tipembere mariri.

²⁵Tinunureiwo TENZI tinokutetererai TENZI tinokutetererai itaiwo kuti tibudirire.

²⁶Ngaarumbidzwe iye anouya muzita raTENZI; tinokurumbidzai tiri mumba yaTENZI.

²⁷TENZI ndiMwari; akatipa chiedza. Batanai mudungwerungwe namapazi enyu mumaoko, kusvika kune zvinenge nyanga zviri paatari.

²⁸Imi ndimi Mwari wangu uye ndichakutendai; ndimi Mwari wangu ndinokukudzai.

²⁹Tendai TENZI nokuti wakanaka, mwoyochena wake hauperi narini.