Read Bhaibhiri Idzva rechiShona Nziyo 119 Bible Online

Nziyo 119 - Bhaibhiri Idzva rechiShona bible

Nziyo 119

¹Vakakomborerwa zvavo vanoupenyu husina chinoshoreka, vanofamba zviri pamutemo waTENZI. Arefu

²Vakakomborerwa vanochengeta mitemo[51] yake, vanomutsvaka nomwoyo wose

³uye vasingaiti zvakaipa asi vanotevera gwara rake.

⁴Makati mitemo yenyu ichengetwe zvakanakisa.

⁵Dai maitiro angu angova akatendeka mukuchengeta mirau yenyu.

⁶Ipapo handizonyadziswa, ziso rangu richagara riri pamitemo yenyu.

⁷Ndichakurumbidzai nomwoyo uri pachokwadi pandinodzidza zvirongwa zvenyu zvakarurama.

⁸Ndichachengeta mitemo yenyu musandirase zvachose.

⁹Ko jaya ringachengete seiko maitiro aro akanaka? Rinofanira kuzvichengetedza maererano neshoko renyu. Beti

¹⁰Ndinokutsvakai nomwoyo wose, itai kuti ndirege kutsauka pamirau yenyu.

¹¹Ndakaisa shoko renyu mumwoyo mangu kuti ndirege kukutadzirai.

¹²TENZI ngaarumbidzwe, ndidzidziseiwo zvirevo zvenyu.

¹³Ndinodudza pachena nomuromo wangu zvakatemwa nomuromo wenyu.

¹⁴Ndinofara namamiriro omutemo wenyu sokufarira kwandinoita upfumi hwose.

¹⁵Ndichafungisisa nezvemirau yenyu ndigorangarira nzira dzenyu.

¹⁶Ndinofarira mitemo yenyu, handimbokanganwi shoko renyu.

¹⁷Ndibatei zvakanakisisa ini muranda wenyu kuti ndirarame ndichengete shoko renyu. Gimeri

¹⁸Zarurai meso angu kuti ndione zvinoshamisa zviri mumutemo wenyu.

¹⁹Ndiri mweni panyika, musandiwanzire mitemo yenyu.

²⁰Mweya wangu unosuwira kwazvo zvirongwa zvenyu panguva dzose.

²¹Munotsiura vanozvikudza, vanhu vorushambwa, vanotetereka kubva pamitemo yenyu.

²²Ndibvisireiwo kunyadziswa nokushorwa nokuti ndakachengeta mitemo yenyu.

²³Kunyange machinda akagara pasi achindirangana, ini muranda wenyu ndicharangarira zvirevo zvenyu.

²⁴Zvamakatema zvinondifadza, ndiwo makurukota angu.

²⁵Ndinorara muhuruva, ndimutsurudzei neshoko renyu. Dareti

²⁶Pandakareurura nzira dzangu makandipindura, ndidzidziseiwo zvirevo zvenyu.

²⁷Itai kuti ndinzwisise mufambiro wemitemo yenyu; ini ndichanyatsofunga nezvamabasa enyu anoshamisa.

²⁸Ndaparara nokusuruvara, ndisimbiseiwo sokutsidza kwamakaita.

²⁹Ndichengetei ndirege kurasika, munyatsondidzidzisawo mutemo wenyu.

³⁰Ndakasarudza nzira yokutendeka, ndakaisa zvirongwa zvenyu pamberi pangu.

³¹Ndinoti kwati kwati nezvamakatema, imi TENZI regai kuti ndinyadziswe.

³²Ndichamhanya nomugwara remitemo yenyu kana mandipa kunzwisisa kwakawanda.

³³TENZI ndidzidziseiwo gwara rezvirevo zvenyu ndicharitevera kusvika kwokugumisa. Ite

³⁴Ndipeiwo kunzwisisa ndichengete mutemo wenyu ndiutevedze nemwoyo wangu wose.

³⁵Nditungamirireiwo munzira yemitemo yenyu nokuti ndinoifarira.

³⁶Rerekerai mwoyo wangu kumitemo yenyu kwete kune zvinondipfumisa.

³⁷Dzorai maziso angu pazvinhu zvisina maturo mundipewo upenyu mugwara renyu.

³⁸Chengetai chitsidzo chenyu kumuranda wenyu chamakatsidza kuna vanokutyai.

³⁹Ndinzvengeseiwo kune kushorwa kwandinotya nokuti zvirongwa zvenyu zvakanaka.

⁴⁰Tarisai muone kuti ndinoshuwira mitemo yenyu. Pamusana pokuti makarurama, ndipeiwo upenyu.

⁴¹Ndiitireiwo mwoyochena wenyu, TENZI mundiponesewo sokutsidza kwenyu. Wawu

⁴²Ndopandingakwanise kupindura vanonyomba nokuti ndinovimba neshoko renyu.

⁴³Musaite kuti ndibva ndatadza kutaura chokwadi zvachose nokuti chitarisiro changu chiri muzvirongwa zvenyu.

⁴⁴Ndichagara ndichichengeta mutemo wenyu narini narini.

⁴⁵Ndichafamba ndakasununguka nokuti ndinotsvaka mitemo yenyu.

⁴⁶Ndichataura nezvemitemo yenyu pana madzimambo, handimbonyari.

⁴⁷Nokuti ndinofarira mitemo yenyu nokuti ndinoida.

⁴⁸Ndinoremekedza mitemo yenyu uye ndinoida uyezve ndichafungisisa zvirevo zvenyu.

⁴⁹Yeukai zvamakataura kumuranda wenyu zvakandipa chitarisiro. Zaini

⁵⁰Chinondinyaradza munhamo yangu ndechichi chokuti chitsidzo chenyu chinondipa upenyu.

⁵¹Vanozvikudza vanondishora zvazviri asi handisiani nomutemo wenyu.

⁵²Pandinorangarira mirau yakare zvinondinyaradza, TENZI.

⁵³Ndinoviruka nehasha pamusana pavakaipa vanokanda pasi mutemo wenyu.

⁵⁴Mitemo yenyu ndiyo rumbo rwangu mumusha wandinogara ndiri muutapwa.

⁵⁵Ndinoyeuka zita renyu usiku TENZI uye ndinochengeta mutemo wenyu.

⁵⁶Ndozvanguwo izvozvo zvokuti ndakachengeta mitemo yenyu.

⁵⁷TENZI ndiye nhaka yangu, ndinotsidza kuchengeta shoko renyu. Heti

⁵⁸Ndinotsvaka nomwoyo wangu wose kuti mundicheukewo, ndinzwireiwo ngoni sokutsidza kwenyu.

⁵⁹Ndikafunga makwara enyu ndinobva ndatendeuka ndotevera mitemo yenyu.

⁶⁰Ndinokurumidza, handinonoki kuchengeta mitemo yenyu.

⁶¹Kunyange misungo yavakaipa ichinditeya handikanganwi mutemo wenyu.

⁶²Ndinomuka pakati pousiku ndichikurumbidzai nokuda kwezvirevo zvenyu zvakarurama.

⁶³Ndiri shamwari yavose vanokutyai, wavose vanochengeta mitemo yenyu.

⁶⁴Nyika izere nemwoyochena wenyu, TENZI, ndidzidzisei mitemo yenyu.

⁶⁵Makachengeta ini muranda wenyu zvakanaka, TENZI, sokutaura kwenyu. Teti

⁶⁶Ndipeiwo ungwaru pakufunga uye ruzivo nokuti ndinovimba nemitemo yenyu.

⁶⁷Ndisati ndarohwa neshamhu ndakarasika asi pari zvino ndinochengeta shoko renyu.

⁶⁸Makanaka uye munoita zvakanaka, ndidzidziseiwo mitemo yenyu.

⁶⁹Vanozvikudza vanondizorazora nhema; asi ndinochengeta mitemo yenyu nemwoyo wangu wose.

⁷⁰Asi vakaoma mwoyo, havana hanya asi ini ndinofarira mutemo wenyu.

⁷¹Zvakanaka kuti ndakamborwadziwa kuti ndidzidze mitemo yenyu

⁷²Mutemo unobva pamuromo penyu urinani kwandiri kupfuura zviuru zvemari yendarama nesirivha.

⁷³Maoko enyu ndiwo akandisika akandiumba, ndipeiwo kunzwisisa kuti ndidzidze mitemo yenyu. Yodi

⁷⁴Vanokutyai vachandiona vagofara nokuti ndakatarisira mamuri.

⁷⁵Ndinoziva kuti zvirongwa zvenyu zvakarurama, TENZI uye kuti makandirwadzisa zviri pamutemo.

⁷⁶Ndinyaradzeiwo nemwoyochena wenyu sokutsidza kwenyu kuneni muranda wenyu.

⁷⁷Svikai kwandiri nengoni dzenyu kuti ndirarame nokuti ndinofarira mutemo wenyu.

⁷⁸Vanozvikudza ngavanyadziswe nokuti vakandipomera nenhema asi ini ndichanyatsofunga nezvemitemo yenyu.

⁷⁹Vanokutyai ngavauye kwandiri kuti vazive mitemo yenyu.

⁸⁰Dai ndikangoteerera mitemo nemwoyo wangu wose kuti ndirege kunyadziswa.

⁸¹Mwoyo wangu unosuwira ruponeso rwenyu shoko renyu ndiro chitarisiro changu. Kafu

⁸²Ndaneta nokutarisira chitsidzo chenyu. Ndinobvunza kuti muchandinyaradza rini,

⁸³nokuti ndafanana nechigubhu chewaini chamatehwe chiri muutsi asi mitemo yenyu handina kuikanganwa?

⁸⁴Ini muranda wenyu ndinofanira kutirira kusvikira rinhiko? Muchatonga rini vanonditambudza.

⁸⁵Vanozvikudza vakandicherera hunza vanhu vasingatevedzi mutemo wenyu.

⁸⁶Mitemo yenyu yose yakatendeka, vanonditambudza namanyepo, ndibatsireiwo.

⁸⁷Vavakutosvika pakuda kundiparadza panyika asi mitemo yenyu handina kuirasa.

⁸⁸Ndiraramiseiwo nemwoyochena wenyu kuti ndichengete mitemo yomuromo wenyu.

⁸⁹TENZI, shoko renyu rakadzika midzi kudenga nokusingaperi. Ramadhi

⁹⁰Kutendeka kwenyu kunosvika kuzvizvarwa nezvizvarwa makadzika nyika uye inoramba yakasimba.

⁹¹Nokuronga kwenyu nanhasi zvichiripo nokuti zvinhu zvose varanda venyu.

⁹²Pasina kutofarira murau wenyu kwandakaita, ndingadai ndakaparara munhamo dzangu.

⁹³Mitemo yenyu handimboikanganwa nokuti ndiyo yamakandiraramisa nayo.

⁹⁴Ndiri wenyu, ndiponeseiwo nokuti ndinotsvaka mitemo yenyu.

⁹⁵Vakaipa vanondivandira kuti vandiparadze, asi ini chandinongofunga mitemo yenyu.

⁹⁶Ndakaona kuti hapana chisina mugumo asi mutemo wenyu ziendanakuenda risina miganhu.

⁹⁷Hakusi kuuda ikoko kwandinoita mutemo wenyu ndiwo wandinongofunga zuva rose. Memi

⁹⁸Mutemo wenyu unoita kuti ndive wakangwara kupinda vavengi vangu nokuti unogara uineni.

⁹⁹Ndinotonzwisisisa kupinda vadzidzisi vangu vose nokuti mitemo yenyu ndiyo yandinongofunga.

¹⁰⁰Ndinotonzwisisa kupinda vakwegura nokuti ndinochengeta mitemo yenyu.

¹⁰¹Ndinozvidzora kunzira dzose dzakaipa kuitira kuti ndichengete shoko renyu.

¹⁰²Handitsaukani nezvirevo zvenyu nokuti makandidzidzisa.

¹⁰³Hakusi kunaka ikoko parurimi kwakaita mashoko enyu, anonaka kupinda uchi mukanwa mangu.

¹⁰⁴Ndinowana kunzwisisa nemitemo yenyu naizvozvo ndinovenga nzira dzose dzenhema.

¹⁰⁵Shoko renyu ndiro rambi retsoka dzangu nemwenje unondivhenekera nzira. Nunu

¹⁰⁶Ndakatsidza uye ndinosimbisisa kuti ndichachengeta zvirevo zvenyu zvakarurama.

¹⁰⁷Ndinorwadziwa zvikuru, TENZI, ndiraramiseiwo sokutsidza kwenyu.

¹⁰⁸TENZI gamuchiraiwo mupiro wangu wokurumbidza mundidzidzisewo zvirevo zvenyu.

¹⁰⁹Ndinogara ndakabatira ura mumaoko asi mutemo wenyu handiukanganwi

¹¹⁰Vaipi vakanditeya asi handitsauki pamitemo yenyu.

¹¹¹Mitemo yenyu ndiyo nhaka yangu nokusingaperi. Ehe, ndiyo rufaro rwomwoyo wangu.

¹¹²Ndakazvipira kuchengeta mitemo yenyu narini kusvika kumugumo.

¹¹³Ndinovenga vanhu vane mwoyo miviri asi chandinoda mutemo wenyu. Sameki

¹¹⁴Ndimi mudziviriri wangu nenhowo yangu, ndinovimba neshoko renyu.

¹¹⁵Ibvai kwandiri imi vaiti vezvakaipa kuti ndiwane machengetero emitemo yaMwari wangu.

¹¹⁶Nditsigireiwo sokutsidza kwamakaita kuitira kuti ndirarame, musaite kuti ndinyare nechitarisiro changu.

¹¹⁷Nditsigirei ndichengeteke ndirambe mwoyo uri pamitemo yenyu.

¹¹⁸Munorasa vanhu vose vanotsauka pamitemo yenyu nokuti varevi venhema, vanyengedzi.

¹¹⁹Munoshora vakaipa samagufu, nokudaro ndinoda mitemo yenyu.

¹²⁰Ndinodedera nokukutyai; ndinotya kutonga kwenyu.

¹²¹Ndakaita zviri pamutemo uye zvakarurama musandisiye mumaoko avanondidzvinyiriri vangu. Aini

¹²²Tsidzai kuti ndimi muchabatsira ini muranda wenyu. Musarege vanozvikudza vachindidzvinyirira.

¹²³Meso angu aneta nokutarisira ruponeso rwenyu nokuzadzikiswa kwechitsidzo chenyu chakarurama.

¹²⁴Ndiitireiwo mwoyochena mundidzidzisewo mitemo yenyu.

¹²⁵Ndiri muranda wenyu, ndipeiwo kunzwisisa kuti ndizive mitemo yenyu.

¹²⁶Yasvika zvino nguva TENZI yokuti muchiwana zvamunoita nokuti mutemo uri kutyorwa.

¹²⁷Naizvozvo ndinoda mitemo yenyu kupinda ndarama, kupinda ndarama yakanakisisa.

¹²⁸Nezvo nemitemo yenyu ndinowana nzira kwayo, ndinovenga maitiro ose ounyengedzi.

¹²⁹Mitemo yenyu yakanaka kwazvo ndokusaka ndichiichengeta.

¹³⁰Shoko renyu parizvino ratambanuka, rinopa chiedza, rinopa vanhuwo zvavo kunzwisisa.

¹³¹Ndinofemereka ndakashama muromo nokuti ndinodisisa mitemo yenyu.

¹³²Ndicheuke mundiitirewo zvakanaka zvamunongoita kuna vanoda zita renyu.

¹³³Ndisimbisei tsoka sokutsidza kwamakaita uipi hurege kunditonga.

¹³⁴Ndinunureiwo kuvadzvinyiriri kuitira kuti ndichengete mitemo yenyu.

¹³⁵Ndiitireiwo mwoyo wakanaka, ini muranda wenyu, mundidzidzise mirau yenyu.

¹³⁶Maziso angu anosvimha misodzi nokuti vanhu havachengeti mutemo wenyu.

¹³⁷TENZI makarurama uye kutonga kwenyu kwakarurama. Tsadhe

¹³⁸Makatema mirau yakarurama, iri pachokwadi chaipo.

¹³⁹Ndinobaiwa mwoyo neshungu nokuti vavengi vangu vanokanganwa zvavo mazwi enyu.

¹⁴⁰Chitsidzo chenyu ndechepachokwadi chaicho uye muranda wenyu anochida.

¹⁴¹Ndiri muduku zvangu uye ndinoshorwa asi handikanganwi mirau yenyu.

¹⁴²Ururami hwenyu hwakarurama nokusingaperi uye mutemo wenyu ndewechokwadi.

¹⁴³Nhamo nokurwadziwa mwoyo zvandiwira, asi ndinofarira mutemo wenyu.

¹⁴⁴Mitemo yenyu yakarurama nokusingaperi ndipeiwo kunzwisisa ndirarame.

¹⁴⁵Ndinochema nemwoyo wangu wose, ndipindureiwo TENZI ndichengete zvirevo zvenyu. Kofu

¹⁴⁶Ndinochema kwamuri, ndiponeseiwo kuti ndichengete mitemo yenyu.

¹⁴⁷Ndinotangira mambakwedza kumuka ndichikumbira rubatsiro, chitarisiro changu chiri mumashoko enyu.

¹⁴⁸Ndinenge ndatosvinura maziso nguva inotsinhanha varindi isati yasvika kuti ndidzamise pfungwa nezvezvitsidzo zvenyu.

¹⁴⁹Nemwoyochena wenyu, inzwai kuchema kwangu, TENZI ndiraramiseiwo noruenzaniso rwenyu.

¹⁵⁰Vanonditambudza vari kuuya kwandiri nepfungwa dzakaipa, vari kure nomutemo wenyu.

¹⁵¹Asi imi muri padyo TENZI uye mitemo yenyu ndeyechokwadi.

¹⁵²Ndakaziva kare zvemitemo yenyu kuti makaidzika nokusingaperi.

¹⁵³Tarisaiwo kutambura kwangu mundinunurewo nokuti handikanganwi mutemo wenyu. Reshi

¹⁵⁴Ndimiririreiwo mundinunure, ndiraramiseiwo sokutsidza kwamakaita.

¹⁵⁵Ruponeso rwuri kure navakaipa nokuti havana hanya nemitemo yenyu.

¹⁵⁶Tsitsi dzenyu dzakawanda, TENZI ndiraramiseiwo noruenzaniso rwenyu.

¹⁵⁷Vanonditambudza navanondirwisa vakawanda asi handitsauki pamitemo yenyu.

¹⁵⁸Ndinotarisa vanyengedzi ndichivasema nokuti havachengeti mitemo yenyu.

¹⁵⁹Rangarirai mudiro wandinoita mitemo yenyu, nemwoyochena wenyu ndichengetereiwo upenyu hwangu.

¹⁶⁰Chokwadi ndicho mwoyo weshoko renyu uye zvirevo zvenyu zvose zvakarurama, zvinogara nokusingaperi.

¹⁶¹Machinda anonditambudza pasina chikonzero asi ini chandinoremekedza zvikuru mumwoyo mangu, mashoko enyu. Shini

¹⁶²Ndinofadzwa neshoko renyu somunhu awana zvokupamba zvakawanda.

¹⁶³Ndinovenga uye ndinosema nhema asi ndinoda mutemo wenyu.

¹⁶⁴Ndinokurumbidzai kanomwe pazuva nokuda kwezvirevo zvenyu zvakarurama.

¹⁶⁵Vanoda mutemo wenyu vane rugare rukuru. Hapana chinovaita kuti vadzadzarike.

¹⁶⁶Ndinotarisira ruponeso rwenyu, TENZI uye ndinochengeta mitemo yenyu.

¹⁶⁷Ndinochengeta mitemo yenyu uye ndinoida zvikuru kwazvo.

¹⁶⁸Ndinochengeta mitemo yenyu nemirawo yenyu nokuti nzira dzangu dzose munodziziva.

¹⁶⁹Regai chichemo changu chisvike kwamuri TENZI regai ndinzwisise sokutsidza kwamakaita. Tau

¹⁷⁰Regai munamato wangu usvike kwamuri mundinunurewo sokutaura kwenyu.

¹⁷¹Muromo wangu uchakurumbidzai nokuti munondidzidzisa mirao yenyu.

¹⁷²Shoko renyu richava rumbo parurimi rwangu nokuti mitemo yenyu yose yakarurama.

¹⁷³Ruoko rwenyu ngarugaririre kundibatsira nokuti changu ini chandakasarudza mitemo yenyu.

¹⁷⁴Ndinosuwira ruponeso rwenyu TENZI uye ndinofarira mutemo wenyu.

¹⁷⁵Ndiraramisei kuti ndikurumbidzei zvirevo zvenyu ngazvindibatsire.

¹⁷⁶Ndatetereka sehwai yarasika Nditsvakei ini muranda wenyu nokuti handikanganwi mitemo yenyu.