Read Bhaibhiri Idzva rechiShona Nziyo 132 Bible Online

Nziyo 132 - Bhaibhiri Idzva rechiShona bible

Nziyo 132

¹Kuunzwa kweBhokisi reChitenderano noumbowo hwaDhavhidhi TENZI rangarirai Dhavhidhi nenhamo dzose dzaakatiirira

²nokutsidza kwaakaita kwamuri TENZI nemhiko yaakaita kunemi Samasimbaose waJakobho kuti,

³“Handipindi mumba mangu kana kurara pamubhedha wangu.

⁴Handibvumiri maziso angu kukotsira kana mafungiro amaziso angu kutsomwaira

⁵dzamara ndawanira TENZI nzvimbo, nzvimbo yokugara yaSamasimbaose waJakobho.”

⁶Takanzwa nezvaro kuEfurata, takariwana mumunda waJaari.

⁷Handei kwaanogara, tindopfugamira pachitambarariko chetsoka dzake.

⁸Simukai TENZI muende, kunzvimbo yenyu yokuzorora imi nebhokisi renyu rechitenderano rine simba.

⁹Vapristi venyu ngavapfeke ururami vatsvene venyu vapururudze norufaro.

¹⁰Pamusana pomuranda wenyu Dhavhidhi musarambe muzodzwa wenyu, nokuti

¹¹TENZI akapika kuna Dhavhidhi, akatsidza mhiko yechokwadi yaasingakandi pasi, achiti, “Mumwe mwana weropa rako ndichamugadza pachigaro chako choumambo.

¹²Kana vana vako vakachengeta chitenderano changu nemitemo yangu yandichavadzidzisa vana vavo vachagarawo pachigaro chako choumambo nokusingaperi.”

¹³Nokuti TENZI akasarudza Zioni akada kuti ive nzvimbo yake yokugara achiti,

¹⁴“Iyi ndiyo nzvimbo yangu yokugara nokusingaperi ndichagara pano nokuti ndakaida.

¹⁵Ndichaikomborera nezvokudya zvakawanda ndichagutsa varombo vayo nechokudya.

¹⁶Ndichapfekedza vapristi vavo nezvinopa ruponeso vatsvene vavo vachapururudza norufaro.

¹⁷Ndichamutsirawo Dhavhidhi mambo ane simba, ndakagadzirira muzodzwa wangu mwenje.

¹⁸Vavengi vake ndichavafukidza nokunyara asi umambo hwake huchabhebha.”