Read Bhaibhiri Idzva rechiShona Nziyo 135 Bible Online

Nziyo 135 - Bhaibhiri Idzva rechiShona bible

Nziyo 135

¹Areruya Rumbidzai zita raTENZI.

²Imi varanda vaTENZI rumbidzai mumipanda yemba yaMwari wedu.

³Rumbidzai TENZI nokuti akanaka imbirai zita rake nokuti ane mwoyo wakanaka.

⁴TENZI akazvisarudzira Jakobho, Isiraeri achimuita wake

⁵nokuti ndinoziva kuti TENZI mukuru uye kuti TENZI wedu mukuru kupinda vamwari vose.

⁶Zvose zvinodiwa naTENZI anogona kuzviita kudenga kana panyika mugungwa kana makadzika.

⁷Ndiye anosimudza makore kwakaperera nyika, anopenyesa mheni yemvura; anoburitsa mhepo mumatura ake.

⁸Ndiye akauraya matangwe eIjipiti, avanhu neemhuka.

⁹Ndiye akatuma zviratidzo nezvishamiso mukati mako iwe Ijipiti achirwisa Farao navaranda vake vose.

¹⁰Akaparadza marudzi mazhinji; akauraya madzimambo ane simba anoti:

¹¹Sihoni mambo wavaAmori naOgu mambo weBhashani noumambo humwe nohumwe hwose hweKenani.

¹²Akapa nyika yavo senhaka, senhaka kuvaIsiraeri, vanhu vake.

¹³Zita renyu TENZI rinogara nokusingaperi, mukurumbira wenyu kusvika kuzvizvarwa nezvizvarwa.

¹⁴TENZI acharwira vanhu vake uye achaitira ngoni varanda vake.

¹⁵Zvifananidzo zvevechirudzi, isirivha nendarama zvakaitwa namaoko avanhu,

¹⁶zvine miromo asi hazvitauri, zvina maziso asi hazvioni

¹⁷zvine nzeve asi hazvinzwi, uye hazvifemi nomuromo wazvo.

¹⁸Vanozviumba vachafanana nazvo, vachafananawo nazvo vanovimba nazvo.

¹⁹Imi imba yokwaIsiraeri rumbidzai TENZI imi imba yokwaAroni rumbidzai TENZI

²⁰imi imba yokwaRevhi rumbidzai TENZI imi munotya TENZI rumbidzai TENZI.

²¹TENZI ngaarumbidzwe muZioni iye anogara muJerusaremu Areruya.