Read Bhaibhiri Idzva rechiShona Nziyo 136 Bible Online

Nziyo 136 - Bhaibhiri Idzva rechiShona bible

Nziyo 136

¹Tendai TENZI nokuti wakanaka mwoyochena wake hauperi.

²Tendai Mwari wavamwari mwoyochena wake hauperi.

³Tendai TENZI wavatenzi mwoyochena wake hauperi.

⁴Iye oga anoita zvishamiso zvikuru mwoyochena wake hauperi.

⁵Iye akasika matenga nokunzwisisa kwake mwoyochena wake hauperi.

⁶Iye akawarira nyika pamvura mwoyochena wake hauperi.

⁷Iye akasika mazivheneko makuru mwoyochena wake hauperi.

⁸Zuva kuti ritonge masikati, mwoyochena wake hauperi.

⁹Mwedzi nenyenyedzi kuti zvitonge usiku mwoyochena wake hauperi.

¹⁰Iye akauraya matangwe eIjipiti mwoyochena wake hauperi.

¹¹Akaburitsa Isiraeri mukati mavo mwoyochena wake hauperi.

¹²Noukuru hwake nesimba guru roruoko rwake mwoyochena wake hauperi.

¹³Iye akapararanisa Gungwa Dzvuku mwoyochena wake hauperi.

¹⁴Akapfuudza Isiraeri nepakati paro mwoyochena wake hauperi.

¹⁵Akakurira Farao nehondo yake muGungwa Dzvuku mwoyochena wake hauperi.

¹⁶Iye akatungamirira vanhu vake nomurenje mwoyochena wake hauperi.

¹⁷Iye akauraya madzimambo makuru mwoyochena wake hauperi.

¹⁸Akauraya madzimambo anomukurumbira mwoyochena wake hauperi.

¹⁹Sihoni mambo wavaAmori mwoyochena wake hauperi

²⁰naOgu mambo weBhashani mwoyochena wake hauperi

²¹akapa nyika yavo senhaka mwoyochena wake hauperi

²²nhaka kuna Isiraeri muranda wake mwoyochena wake hauperi.

²³Ndiye akatiyeuka patakanga tasvika pakadzama mwoyochena wake hauperi.

²⁴Akatinunura kuvavengi vedu mwoyochena wake hauperi.

²⁵Iye anopa chokudya kuzvinhu zvose zvipenyu mwoyochena wake hauperi.

²⁶Tendai Mwari wokudenga mwoyochena wake hauperi.