Read Bhaibhiri Idzva rechiShona Nziyo 139 Bible Online

Nziyo 139 - Bhaibhiri Idzva rechiShona bible

Nziyo 139

¹Mwari anoziva zvose TENZI makandiongorora mukandiziva.

²Munoziva mafambiro namagariro munonzwisisa pfungwa dzangu imi muri kure zvenyu.

³Imi munocherechedza kufamba kwangu nokurara kwangu uye munoziva nzira dzangu dzose,

⁴nokuti izwi risati rambove parurimi rwangu, imi TENZI munenge matonyatsoriziva.

⁵Munondikomberedza mberi neshure muchitoisa ruoko rwenyu pandiri.

⁶Ruzivo rwakadaro runondishamisa zvakanyanyisisa, rwuri pamusoro handimbokwanisa kuruwana.

⁷Kwandingaende ndokupiko, kusina Mweya wenyu uye ndingatizire kupiko kwamusiri

⁸nokuti ndikati ndiende kudenga imi muriko? Ndikati ndiwarire uvato hwangu kunzvimbo yavakafa imi muriko,

⁹ndikati regai ndipepereke nemhepo yorungwanani ndichindogara kwakaperera gungwa,

¹⁰kunyange ikoko ruoko rwenyu ndirwo ruchanditungamirira makandibata noruoko rwenyu rworudyi.

¹¹Ndikati nditi rima rindifukidze uye kuti chiedza chiri pandiri chive usiku

¹²kunyange rima harina kusviba kwamuri, usiku hwakachena samasikati. Kwamuri rima nechiedza zvakangofanana.

¹³Nokuti ndimi makaumba nhengo dzangu dzomukati-kati. Ndimi makandiruka munhumbu maamai vangu.

¹⁴Ndinokurumbidzai nokuti munotyisa uye munoshamisa. Mabasa enyu anoshamisa munonyatsondiziva.

¹⁵Zvandiri zvakanga zvisina kuvanzika kwamuri pandaiumbwa muchivande, ndichinyatsosonanidzwa pasi pasi chaipo penyika.

¹⁶Makandiona nemeso nhengo dzangu dzisati dzaumbwa. Dzakanga dzanyorwa mubhuku menyu dzikazoumbwa panguva yadzo kusvikira dzose dzapera.

¹⁷Hakusi kukosha kwakaita pfungwa dzenyu kwandiri TENZI uye hakusi kukura kwadzakaita.

¹⁸Dai kuri kuti ndinodziverenga, dzakawanda kupinda jecha. Pandinomuka ndinenge ndisati ndambopedza nemi.

¹⁹Dai muchingouraya zvenyu vakaipa, Mwari uye kuti mhondi dzisudurukane neni

²⁰vanhu vanotaura vachikushorai zvakaipa vanokumukirai zvakaipa.

²¹Vanokuvengai TENZI handivavengi here ini? Handivengi here vanokumukirai, TENZI?

²²Ndinovavenga zvokuvavenga zviya, vanotovawo vavengi vangu.

²³Ndiongororeiwo Mwari muzive zviri mumwoyo mangu. Ndiedzei muzive zvandinofunga

²⁴muone kana mune chakaipa mandiri munditungamirire munzira yokugara nokugara.