Read Bhaibhiri Idzva rechiShona Nziyo 143 Bible Online

Nziyo 143 - Bhaibhiri Idzva rechiShona bible

Nziyo 143

¹Kukumbira rubatsiro Inzwai munamato wangu TENZI; teererai chichemo changu. Ndipindureiwo nokutendeka kwenyu noururami hwenyu.

²Musapinze ini muranda wenyu dare nokuti hapana mupenyu akarurama pamberi penyu,

³nokuti muvengi ari kundironda; andibvumburudza muvhu. Akaita kuti ndigare murima savakafa kare kare.

⁴Ndokusaka ndapererwa nesimba, ndadzongodzwa mwoyo ini.

⁵Ndinoyeuka mazuva akare, ndinorangarira zvose zvamakaita ndinofungisisa zvakaitwa namaoko enyu.

⁶Ndinosimudzira maoko angu kwamuri mweya wangu une nyota nemi sapasi pakaoma. Dzepfunde.

⁷Kasikai kundipindura TENZI ndapererwa ini, musavanze uso hwenyu ndingadaro ndikaita savaya vanoenda kuguva.

⁸Regai ndinzwe nezvemwoyochena wenyu mangwanani nokuti ndinovimba nemi. Ndidzidziseiwo nzira yandingafambe nayo, nokuti ndinosimudzira pfungwa nemwoyo wangu kunemi.

⁹Ndinunureiwo kuvavengi vangu TENZI ndinopotera kwamuri.

¹⁰Ndidzidziseiwo kuita kuda kwenyu nokuti ndimi Mwari wangu; mweya wenyu wakanaka ngaunditungamirire nomunzira yakati sandara.

¹¹Ndichengetedzeiwo ndiri mupenyu nokuda kwezita renyu, pamusana poururami hwenyu, ndiburitseiwo mumatambudziko.

¹²Pamusana pomwoyochena wenyu, paradzai vavengi vangu, muparadze mhandu dzangu dzose nokuti ndiri muranda wenyu.