Read Bhaibhiri Idzva rechiShona Nziyo 144 Bible Online

Nziyo 144 - Bhaibhiri Idzva rechiShona bible

Nziyo 144

¹Munamato wamambo wokutenda Ngaarumbidzwe TENZI dombo rangu, anodzidzisa maoko angu hondo uye minwe yangu kurwisa.

²Ndiye dombo rangu nenzvimbo yangu yokuzvidzivirira nayo muhondo, ndiye nhare yangu nomununuri wangu. Ndiyewo nhoo yangu nediziro rangu iye anoisa vanhu pasi pangu.

³Nhai TENZI iye munhu chiikowo zvake wamunorangarira iye munhuwo zvake wamunofunga.

⁴Munhu akaita sefemo, mazuva ake akaita somumvuri unopfuura.

⁵Kotamisai matenga enyu muburuke TENZI, batai makomo apfumbuke utsi.

⁶Penyesai mheni muvamwararise; tumai miseve yenyu muvadzipure.

⁷Tambanudzai ruoko rwenyu kubva kumusoro ikoko mundinunure, mundiponese mumvura zhinji, mumaoko avatorwa

⁸vane miromo inoreva nhema vane ruoko rworudyi ruoko rwerudyi rwokutsidza narwo nhema.

⁹Ndichakuimbirai rwiyo rutsva, Mwari ndichikuridzirai dimbwa rine gumi retambo.

¹⁰Imi munoita kuti madzimambo akurire imi makanunura Dhavhidhi muranda wenyu.

¹¹Ndinunurei kubakatwa rehondo youtsinye; mundinunure mumaoko avatorwa, vanhu vanotaura manyepo vano ruoko rwavo rworudyi, ruoko rworudyi rwokutsidza narwo nhema.

¹²Tinokumbirawo kuti vana vedu vakomana, kubvira pauduku hwavo vaite sezvinomera zvakasvika, vana vedu vasikana vave sembiru dzapamakona dzakavezerwa kuvaka muzinda.

¹³Matura edu ngaazare apote achiwanisa vanhu zvinhu zvose. Hwai dzedu dzibereke gumi nefararira mumafaro muve namazana akazanirana.

¹⁴Mombe dzedu ngadzive navana vakawanda, pasina isingabereki kana inosvodza. Parege kuva nokuungudza mumigwagwa yedu.

¹⁵Rwakakomborerwa rudzi rwakadaro, rwakakomborerwa rudzi runa TENZI samwari warwo.