Read Bhaibhiri Idzva rechiShona Nziyo 145 Bible Online

Nziyo 145 - Bhaibhiri Idzva rechiShona bible

Nziyo 145

¹Rumbo rwokurumbidza Mwari mambo Ndinokukudzai Mwari wangu namambo wangu, ndicharumbidza zita renyu narini narini.

²Ndichakurumbidzai mazuva ose ndichikudza zita renyu narini narini.

³TENZI mukuru uye anofanira kurumbidzwa zvikuru; ukuru hwake haugoni kutsvagurudzwa hukawanikwa.

⁴Chizvarwa chicharumbidza kune chimwe chizvarwa mabasa enyu uye chichaparidza zviito zvesimba renyu.

⁵Ndichanyatsofungisisa nezvomukurumbira woumambo hwenyu husingaitiki uye nezvamabasa enyu anoshamisa.

⁶Vanhu vachataura nezvesimba rezvamunoita zvinotyisa; ini ndicharondedzera ukuru hwenyu.

⁷Vachakurukura kwazvo mukurumbira wokunaka kwenyu kukuru uye vachaimba zvikuru nezvokururama kwenyu.

⁸TENZI akanaka uye ane tsitsi, haakurumidzi kushatirwa uye azere nemwoyochena.

⁹TENZI akanaka kumunhu wose uye ane tsitsi nechose chaakasika.

¹⁰Zvose zvamakasika zvichakutendai TENZI uye vatsvene venyu vose vachakutunhidzai;

¹¹vachataura nezvembiri youmambo hwenyu vachikurukura nezvesimba renyu,

¹²kuzivisa vanhu simba ramabasa enyu uye mukurumbira woumambo hwenyu husingaitiki.

¹³Umambo hwenyu umambo hwokugara nokugara kutonga kwenyu kunogara kwezvizvarwa nezvizvarwa. TENZI anotendeka pane zvose zvaanotaura uye zvaanoita zvose anozviita nemwoyochena.[57]

¹⁴TENZI anotsigira vanenge vavakuputsika uye anosimudzira vanenge varasiswa mwoyo.

¹⁵Meso ose anotarisa kwamuri imi muchivapa chokudya chavo nenguva yakafanira.

¹⁶Munotambanudza ruoko rwenyu muchigutsa nezvinodiwa nechinhu chose chipenyu.

¹⁷TENZI akarurama panzira dzake dzose uye ane mwoyochena pane zvose zvaanoita.

¹⁸TENZI ari pedyo navanodanidzira kwaari kuna vose vanodanidzira kwaari muchokwadi.

¹⁹Anozadzisa zvido zvavanomutya uye anonzwa kuchema kwavo achivaponesa.

²⁰TENZI anochengetedza vose vanomuda asi vakaipa vose anovaparadza.

²¹Muromo wangu uchataura uchirumbidza TENZI vanhu vose ngavarumbidze zita rake rinoera narini narini.