Read Bhaibhiri Idzva rechiShona Nziyo 147 Bible Online

Nziyo 147 - Bhaibhiri Idzva rechiShona bible

Nziyo 147

¹Rumbidzai TENZI, zvakanaka kuimba tichirumbidza Mwari wedu. Nokuti wakanaka uye zvakakodzera seiko kumuombera norumbo tichimurumbidza.

²TENZI anovakazve Jerusaremu, anounganidza vakaraswa vaIsiraeri.

³Anorapa vakarasa mwoyo, anosunga maronda avo.

⁴Ndiye akaronga uwandu hwenyenyedzi ndiye anodzidoma dzose namazita adzo.

⁵TENZI wedu mukuru uye ane simba rakawanda uye kunzwisisa kwake hakutauriki.

⁶TENZI anosimudzira vakadzvinyirirwa vakaipa anovaputsira pasi.

⁷Imbirai TENZI muchimutenda ridzirai Mwari wedu mumhanzi nechipendani.

⁸Anofukidza denga namakore; anonaisa mvura panyika; anokurisa uswa pamakomo.

⁹Ndiye anopa mhuka zvokudya zvadzo uye manyana amakunguo anochema.

¹⁰Haanei navanovimba nesimba ramabhiza, kana navanovimba navarwi vakasimba makumbo,

¹¹asi TENZI anofadzwa navanomutya vanovimba nomwoyochena wake.

¹²Rumbidza TENZI, Jerusaremu; rumbidza Mwari wako iwe Zioni

¹³nokuti anosimbisa zvihuri zvemisuwo yako mikuru anokomborera vana vari mauri.

¹⁴Anopa nyika yako rugare, anokugutsa nembeswa dzakanakisisa.

¹⁵Anotuma chirevo kunyika, shoko rake rinobva ramhanya nokukasika.

¹⁶Anounza mazaya echando sewuru; anoparadzira mazaya echando chamangwanani sedota.

¹⁷Anokanda chivhuramahwe samavhinga; ndiani angatirire chando chake.

¹⁸Anongotaura izwi chete zvichibva zvanyongodeka, anovhuvhutisa mhepo yake mvura ichibva yayerera.

¹⁹Akataura mazwi ake kune vekwaJakobho nemirao nezvirevo zvake kuvaIsiraeri.

²⁰Haana kumboita zvakadai norumwe rudzi. Havazivi zvirevo zvake. Areruya.