Read Bhaibhiri Idzva rechiShona Nziyo 148 Bible Online

Nziyo 148 - Bhaibhiri Idzva rechiShona bible

Nziyo 148

¹Areruya. Rumbidzai TENZI kumatenga; murumbidzei kumusorosoro.

²Murumbidzei imi vatumwa vake vose; murumbidzei imi hondo dzake dzose.

³Murumbidzei imi zuva nemwedzi; murumbidzei imi nyenyedzi dzinopenya.

⁴Murumbidzei imi matenga okumusorosoro nemi mvura dzokumusoro kwamatenga.

⁵Ngazvirumbidze zita raTENZI nokuti akataura, izvo zvikabva zvasikwa.

⁶Akazvimisa panzvimbo yazvo nokusingaperi, akazvisiira miganhu yazvo yazvisingapfuuri.

⁷Pasi ngaparumbidzewo TENZI: imi mazigaranyanya nemi hwenje hose hwegungwa

⁸newe moto nechivhuramahwe namazaya echando namazaya echando chamangwanani nemi dutu remhepo rinoita zvaanoreva;

⁹imi makomo nezvikomo zvose, miti yemichero nemisidhari yose,

¹⁰imi zvikara nemi mombe dzose, imi zvinhu zvinokambaira, nemi shiri dzinobhururuka,

¹¹nemi madzimambo apasi nemi vanhu vose, imi machinda nemi vatongi vose vapasi

¹²nemi majaya nemhandara pamwechete imi vakwegura nemi vana,

¹³rumbidzai zita raTENZI nokuti zita rake roga ndiro riri pamusorosoro, mukurumbira wake, denga napasi zvinosara pasi.

¹⁴Akaita kuti vanhu vake vave rudzi rune simba varurami vake vose ngavarumbidzwe ngavarumbidzwe vanhu veIsiraeri vari pedyo naye. Areruya.