Read Bhaibhiri Idzva rechiShona Nziyo 18 Bible Online

Nziyo 18 - Bhaibhiri Idzva rechiShona bible

Nziyo 18

¹Rwiyo rwaDhavhidhi rwokukunda Ndinokudai TENZI, imi simba rangu.

²TENZI ndiye bako rangu, ndiye nhare nomununuri wangu. Mwari wangu ndiye bako rangu, maari ndimo mandinopotera. Ndiye nhoo yangu, ndiye ane simba rokundiponesa ndiye nhare yangu yokuzvidzivirira nayo muhondo.

³Ndinodaidzira kuna TENZI; iye anofanira kurumbidzwa, ndinobva ndatonunurwa kuna vanondivenga.

⁴Nokuti misungo yorufu yakandikomberedza, mafashamo ohumharadzi akandirwisa.

⁵Tambo dzenzvimbo yavachakabvu dzakandikochekera mariva orufu akandigaririra.

⁶Munhamo yangu iyi ndakachema kuna TENZI. Ndakachema kuna iye Mwari wangu, kuti andibatsire muTemberi yake, iye akanzwa izwi rangu, kuchema kwangu kukasvika munzeve dzake.

⁷Nyika yakadedera ikandengendeka, nheyowo dzamakomo dzakazunguzika dzikatetemera nokuti akanga ashatirwa.

⁸Akafemeruka utsi mumhuno dzake, mukanwa make aine rimi romoto rinororomesa. Mukabuda mazimbe anobvira moto.

⁹Akabvarura denga akaburuka, gore dema riri pasi petsoka dzake.

¹⁰Akanga akakwira pakerubhu akabhururuka, akauya nokukurumidza achibhururuka mumhepo.

¹¹Akaita kuti rima rimukwidibire rakamutenderedza makuti matematema chaiwo emvura akaaita chokuhwanda nacho.

¹²Mukupenya kwaiva mberi kwake, pakabuda nomumakore chimvuramahwe namazhenje omoto.

¹³TENZI akadhiriridza mumatenga'mu, izwi raNyadenga rikariridza. Kwakaita chivhuramahwe namazimbe omoto.

¹⁴Akakanda miseve yake vakati dzvamu kuparara, akapenyesa mheni vakati ware kuparara.

¹⁵Makoronga omugungwa akaoneka, pagere nyika pakanyatsoti pachena yacha nokutsiura kwenyu, TENZI nedutu rinobva mumhuno dzenyu.

¹⁶Akandisveerera ruoko ari kumusoro akanditora, akandinyurura mumvura zhinji.

¹⁷Akandinunura kuvavengi vangu vane simba nokuna vaindivenga, nokuti vaiva nesimba kupinda ini.

¹⁸Vakandivinga pazuva renhamo dzangu, asi TENZI ndiye akava musimboti wangu.

¹⁹Akandiburitsamo akanditi murusununguko tupfunu, akandinunura nokuti anondifarira.

²⁰TENZI akandipa mubayiro, maererano nokururama kwangu, akandidzorera zvinofambiranawo, nokuchena maoko kwandakaita; akandipa mubayiro

²¹nokuti ndakarambira ndiri mumakwara aTENZI; handina kuita chakaipa chokusiyana naMwari wangu,

²²nokuti chainditungamirira, zvirongwa zvake zvose, mirawo yake handina kuibvisa kwandiri.

²³Kwaari, handina chinoshoreka. Ndakazvichengeta ndisina mhosva.

²⁴Ndokusaka TENZI andidzorerawo maererano nokururama kwangu zvichifambiranawo nokuchena kwamaoko angu mukuona kwake.

²⁵Kuna akatendeka imi makatendeka, kune akarurama imi makarurama.

²⁶Kuna ane mwoyo wakanaka imi makanaka, asi kune ane muitiro wakakombama, imiwo munobva mavava.

²⁷Munonunura vanotambudzika, asi vanozvikudza, munovaorora.

²⁸Sezvo imi TENZI murimi mwenje wangu, imi Mwari wangu ndimi munondivhenekera murima;

²⁹nokuti nemi ndinoparadza chikwata chavarwi, ndiina Mwari wangu, rusvingo ndinosvetuka.[5]

³⁰Mwari uyu, nzira dzake dzakarurama, zvinotaurwa naTENZI ndezvechokwadi inhoo yavose vanopotera kwaari.

³¹Ndiani Mwari, kunze kwaTENZI? Ndiani dombo kunze kwaMwari wedu?

³²Ndiye Mwari akandipa simba akaita kuti nzira yangu ifambike.

³³Makumbo angu anoaita seengururu, kunyange pamangoringori anoita kuti ndimire.

³⁴Anodzidzisa maoko angu kurwa hondo zvokuti kunyange uta hwendarira, maoko angu anogona kutatamura.

³⁵Ruponeso rwenyu ndiyo nhoo yamakandipa, rudyi rwenyu rwakanditsigira. Rubatsiro rwenyu rwakaita kuti ndive mukuru mukuru.

³⁶Pokutsika netsoka dzangu, makandipa pakuru zvokuti tsoka dzangu, kutsvedzemuka hadzina.

³⁷Ndakaronda vavengi vangu ndikavabata, ndikatozofuratira vapera kuti dhu.

³⁸Ndakavapwanya-pwanya zvokuti havana kukwanisa kumuka, vakati rakata pasi petsoka dzangu.

³⁹Makandipa simba rokurwa hondo mukaita kuti vavengi vangu vandigwadamire.

⁴⁰Vanondivenga makaita kuti vanditize vanondivenga ndikavaparadza.

⁴¹Vakachemera rubatsiro asi panga pasina wokuvanunura, vakachema kuna TENZI asi haana kuvapindura.

⁴²Ndakavakuya-kuya seguruva revhu ndakavarasa sedhaka munzira.

⁴³Makandinunura mumhirizhonga yomumba mangu makandiita musoro wendudzi dzavanhu vanhu vandakanga ndisingamboziva vakandishandira.

⁴⁴Vatorwa vaiuya kwandiri vachitodemba, vaiti vakangondinzwa chete vainditeerera.

⁴⁵Vatorwa vakarasa mwoyo, vakabuda munhare dzavo vachidedera.

⁴⁶TENZI mupenyu, iye dombo rangu, ngaarumbidzwe, ngaatunhidzwe Mwari, muponesi wangu.

⁴⁷Mwari anonditsivira anondiisira ndudzi dzavanhu pasi pangu

⁴⁸akandipunyutsa kuvavengi vangu. Makandisumudzira pamusoro pavavengi vangu, mukandinunura kuvanhu vehondo.

⁴⁹Naizvozvo ndinokurumbidzai imi TENZI mukati mendudzi ndichaimba ndichirumbidza zita renyu.

⁵⁰Anopa mambo wake kukunda kukuru kwazvo, anoitira mwoyochena muzodzwa wake Dhavhidhi nezvizvarwa zvake narini wose.