Read Bhaibhiri Idzva rechiShona Nziyo 25 Bible Online

Nziyo 25 - Bhaibhiri Idzva rechiShona bible

Nziyo 25

¹Munamato womunhu ari munhamo Ndinosimudzira mwoyo wangu kwamuri TENZI.

²Mwari wangu ndinovimba nemi, musandirege ndichinyadziswa; vavengi vangu ngavarege kunditsvinyira.

³Vose vanotarisira mamuri ngavarege kunyadziswa; asi vanonyengedza pasina chikonzero ngavanyadziswe.

⁴TENZI, ndiziviseiwo nzira dzenyu ndidzidziseiwo makwara enyu.

⁵Nditungamirireiwo muchokwadi chenyu mundidzidzise nokuti ndimi Mwari muponesi wangu. Ndinotarisira kwamuri zuva rose.

⁶Rangarirai, TENZI, tsitsi dzenyu uyewo mwoyochena wenyu nokuti zvaivapo kubvira pasi chigare.

⁷Musarangarire zvitadzo zvapauduku hwangu kana zvikanganiso zvangu. Maererano nemwoyochena wenyu, ndiyeukeiwo TENZI pamusana porunako rwenyu.

⁸TENZI akanaka uye akarurama saka anodzidzisa vatadzi nzira.

⁹Anotungamirira vanozvirereka muururami achidzidzisa vanozvirereka nzira yake.

¹⁰Nzira dzose dzaTENZI, mwoyochena nechokwadi kuna vanochengeta chitenderano chake nemitemo yake.

¹¹Pamusana pezita renyu, TENZI ndiregerereiwo chitadzo changu nokuti chakakura.

¹²Ndiani anotya TENZI? Iyeyo ndiye waachadzidzisa nzira yaanofanira kusarudza.

¹³Iye acharamba achibudirira, vana vake vachava varidzi venyika.

¹⁴Ushamwari naTENZI ndehwevanomutya uye anovazivisa chitenderano chake.

¹⁵Meso angu anogara akatarisa kuna TENZI nokuti ndiye anotakanura makumbo angu mumambure.

¹⁶Ndicheukeiwo mundinzwire tsitsi nokuti ndiri ndoga uye ndinorwadziwa.

¹⁷Ndisunungureiwo kunhamo dziri mumwoyo mangu; ndinyurureiwo mukushushikana kwangu.

¹⁸Tarisai kutambudzika kwangu nokunetsekana kwangu mundiregererewo zvitadzo zvangu.

¹⁹Tarisai muone kuwanda kwakaita vavengi vangu uye muone kundipengera kwavanoita noruvengo vanondivenga.

²⁰Ndichengetedzereiwo upenyu hwangu mundinunure. Musandirege ndichinyadziswa nokuti ndinopotera kwamuri.

²¹Kuva pachokwadi noururami ngazvindichengete nokuti ndinotarisira kwamuri.

²²Mwari nunurai Isiraeri kumatambudziko ayo ose.