Read Bhaibhiri Idzva rechiShona Nziyo 27 Bible Online

Nziyo 27 - Bhaibhiri Idzva rechiShona bible

Nziyo 27

¹Munamato womunhu anovimba naMwari zvakanyanya TENZI ndiye chiedza changu noruponeso rwangu. Ndiani wandingatye? Paupenyu hwangu, TENZI ndiye diziro rangu. Ndiani wandingatye?

²Kana vakaipa vondirwisa vachitaura zvakaipa nezvangu. Mhandu navavengi vangu vachadzadzarika vagowira pasi.

³Kunyange ndikakombwa nehondo mwoyo wangu haungatyi kunyange hondo ikandimukira kuvimba kwangu nemi kucharamba kuripo.

⁴Ndinokumbira kuna TENZI chinhu chimwechete ichocho ndicho chandinotsvaka chokuti ndigare zvangu mumba maTENZI mazuva ose oupenyu hwangu kuitira kuti ndione kunaka kwaTENZI uye kuti ndibvunzire[13] kwaari muTemberi yake.

⁵Achandivanza mudumba rake pazuva renhamo; achandiviga pakavanda mutendhe yake, achandiisa pamusoro pedombo.

⁶Zvino ipapo ndichapasimudza musoro pamusoro pavavengi vangu vakandikomberedza. Ndichapira zvibayiro norufaro rukuru mutendhe yake. Ndichaimba, ndichiimbira TENZI rwiyo.

⁷Teereraiwo izwi rangu, TENZI pandinodanidzira ndiitireiwo ngoni mundidavire.

⁸Imi makati, “Tsvakai uso hwangu.” Mwoyo wangu unoti kwamuri, “Uso hwenyu TENZI ndihwo hwandinotsvaka.”

⁹Musavanze uso hwenyu kwandiri musandidzinge nehasha ini muranda wenyu, ndimi mangamuri mubatsiri wangu. Musandisiye, musandirase, Mwari mununuri wangu.

¹⁰Baba naamai vangandirase zvavo asi TENZI achandigamuchira.

¹¹TENZI ndiratidzei nzira yenyu munditungamirire mugwara rakati tasa pamusana pavavengi vangu.

¹²Musandiise mumaoko avavengi vangu nokuti zvapupu zvenhema zvandimukira uye vanofemereka nehasha.

¹³Ndinovimba kuti ndichaona kunaka kwaTENZI munyika yavapenyu.[14]

¹⁴Tarisira muna TENZI, simba ushinge mwoyo. Tarisira muna TENZI.