Read Bhaibhiri Idzva rechiShona Nziyo 31 Bible Online

Nziyo 31 - Bhaibhiri Idzva rechiShona bible

Nziyo 31

¹Munamato womunhu anenge ava nenhamo Ndinopotera kwamuri TENZI, musaite kuti ndinyadziswe. Sezvamuri vakarurama kudai, ndinunureiwo.

²Rerekererai nzeve yenyu kwandiri mukurumidze kundinunura; ivai kwandiri dombo rokupotera naro, nhare yakasimba yokundinunura.

³Imi ndimi dombo rangu nenhare yangu pamusana pezita renyu, ndiratidzei pokufamba napo munditungamirire.

⁴Nditakanurei mumambure andateerwa zvakavanzika nokuti ndimi diziro rangu.

⁵Mumaoko enyu ndinoisa mweya wangu. Makandinunura, TENZI, Mwari wechokwadi.

⁶Munovenga[18] vanoremekedza vamwari vasina maturo asi ini ndinovimba nemi TENZI.

⁷Ndinopururudza nokufarira mwoyochena wenyu nokuti imi makaona nhamo yangu makazivawo pfumvu yangu.

⁸Hamuna kundiisa mumaoko omuvengi makandiisa munzvimbo yandinogona kufamba pamadiro.

⁹Ndinzwireiwo tsitsi TENZI nokuti ndiri munhamo. Ziso rangu rasakara nokuchema ndizvozvowo zvine mweya wangu nomuviri wangu.

¹⁰Upenyu hwangu hwaperera mukusuwa namakore angu aperera mukutura befu simba rangu rapera pamusana pepfumvu[19] yangu mapfupa angu asakara.

¹¹Ndinozvidzwa navavengi vangu vose, chinhu chinoshoreka kwazvo kuva vavakidzani vangu. Vazivikanwi vangu vavakutonditya vanondiona mumugwagwa vanonditiza.

¹²Ndakatokanganikwa somunhu akafa. Ndaita somudziyo wakapwanyika.

¹³Nokuti ndiri kunzwa vazhinji vachiita kazevezeve; mativi ose zvangove zvinotyisa. Pavanorangana zvokundirwisa vachirangana zvokuda kundiuraya.

¹⁴Asi ini ndinovimba nemi TENZI ndinoti ndimi Mwari wangu.

¹⁵Upenyu hwangu huri mumaoko enyu ndinunureiwo mumaoko avavengi vangu navanonditambudza.

¹⁶Ndinyevenutsireiwo mwoyo ini muranda wenyu mundinunurewo nemwoyochena wenyu.

¹⁷Musaite kuti ndinyadziswe, TENZI nokuti ndinochema kwamuri. Vakaipa ngavave ivo vanonyadziswa ngavadzike kunzvimbo yavakafa chinyarire.

¹⁸Miromo inoreva nhema ngainyaradzwe, inotaura zvakaipa kuvarurami ichizvikudza nokuzvitutumadza nokuzvidza.

¹⁹Hakusi kuwanda ikoko kwezvakanaka zvamakaunganidzira vanokutyai, zvamunoitira vanopotera mamuri vanhu vachiona.

²⁰Nokuvapo kwenyu munovahwandisa kune zvinorongwa navanhu, munovavanza mudumba[20] renyu kunhamo dzavana vana pamuromo

²¹TENZI ngaarumbidzwe nokuti akandiratidza zvinoshamisa mwoyochena wake pandaive ndakakombwa, seguta riri kurwiswa.

²²Pandaive ndadumbirwa ndakati ndadzingirwa kure nemi asi imi makanzwa munamato wangu pandakachemera rubatsiro kwamuri.

²³Idai TENZI imi vatsvene vake. TENZI anochengeta vakatendeka vake; asi anoranga zvakanyanya munhu wose anozvikudza.

²⁴Simbai mutsunge mwoyo imi mose munotarisira muna TENZI.