Read Bhaibhiri Idzva rechiShona Nziyo 33 Bible Online

Nziyo 33 - Bhaibhiri Idzva rechiShona bible

Nziyo 33

¹Farai muna TENZI imi makarurama vari pachokwadi ndivo vanokodzera kumurumbidza.

²Rumbidzai TENZI nechipendani, muimbirei nedimbwa rine waya gumi,

³muimbirei rumbo rutsva, mumuridzirei zvakanaka, muchipururudza,

⁴nokuti shoko raTENZI rakatendeka uye basa rake rose rinoitwa muchokwadi.

⁵Anoda ururami noruenzaniso nyika izere nemwoyochena waTENZI.

⁶Matenga akaitwa nezwi raTENZI uyewo hondo nehondo yezvirimo zvakaitwa nefemo romuromo wake.

⁷Akaunganidza makungwa pamwechete akaaita semurwi, mvura yakadzika akaiisa mumatura.

⁸Nyika yose ngaitye TENZI, vagari vose vapasi pano ngavamudedere

⁹nokuti akataura zvikaitika akati ngazvimire zvikamira.

¹⁰TENZI anoshaisa basa mazano amarudzi anoshaisa maturo zvirongwa zvavanhu.

¹¹Zano raTENZI rinoramba riripo nokusingaperi zvaanofunga mumwoyo make zvinosvika kuzvizvarwa zvose.

¹²Rwakakomborerwa rudzi rwakaita TENZI Mwari warwo; vanhu vaakasarudza kuva nhaka yake.

¹³TENZI anotarisa pasi ari mudenga anoona vanhu vose.

¹⁴Kubva pachigaro chake chokutonga anotarisa vagari vose vapanyika.

¹⁵Iye anopa munhu nomunhu mwoyo waanawo, anoziva zvose zvavanoita.

¹⁶Mambo haanunurwe nokukura kwakaita hondo yake. Gamba rokurwa hariponeswe nesimba raro guru.

¹⁷Bhiza chinhu chisina maturo pakuponesa, Kunyange zvaro riine simba guru, harikwanisi kuponesa.

¹⁸Tarisai muone kuti ziso raTENZI riri pana vanomutya riri kune vane chitarisiro kumwoyochena wake

¹⁹kuti avanunure kurufu uye kuti avararamise panguva yenzara.

²⁰Tinotarisira muna TENZI ndiye rubatsiro rwedu nenhoo yedu.

²¹Mwoyo yedu inofara naye nokuti tinovimba nezita rake rinoera.

²²Mwoyochena wenyu ngauve patiri TENZI sokutarisira kwatinoita kwamuri.