Read Bhaibhiri Idzva rechiShona Nziyo 34 Bible Online

Nziyo 34 - Bhaibhiri Idzva rechiShona bible

Nziyo 34

¹Kunaka kwakaita Mwari, ruenzaniso rwake Ndicharumbidza TENZI nguva dzose kumurumbidza hakuchabvi pamuromo pangu.

²Ini ndinodada naTENZI. Dai varombo vakazvinzwawo vafare.

³Ngatikudzei TENZI pamwechete neni, ngatirumbidzei zita rake pamwechete.

⁴Ndakatsvaka TENZI akandipindura; akandinunura kunazvose zvaindityisa.

⁵Tarisai kwaari mupenye, naizvozvo uso hwenyu hauzombonyari.

⁶Murombo uya akachema TENZI akamunzwa akamununura kumatambudziko ake ose.

⁷Mutumwa waTENZI anokomberedza vanomutya achivanunura.

⁸Ravirai munzwe kunaka kwaTENZI, akakomborerwa munhu anopotera kwaari.

⁹Ityai TENZI imi vatsvene vake; vanomutya hapana chavanoshaya.

¹⁰Zvigondora zveshumba zvinoshaya chokubata, zvinonzwa nzara; asi vanotsvaka TENZI hapana chavanoshaya.

¹¹Uyai vana mundinzwe; ndichakudzidzisai kutya TENZI.

¹²Ndiani anoda zvake upenyu anoda upenyu hurefu nokuwana upenyu hwakanaka?

¹³Zvidzore rurumi rwako kuuipi, miromo yako irege kutaura nhema.

¹⁴Siyana nouipi uite zvakanaka, tsvaka rugare urutevere.

¹⁵Maziso aTENZI ari pavarurami, nzeve dzake dzakarerekera kuchichemo chavo.

¹⁶Uso hwaTENZI hwakanangana navakaipa kuti vakanganwike panyika.

¹⁷Kana vakarurama vakachemera rubatsiro TENZI anovanzwa achivanunura munhamo dzavo dzose.

¹⁸TENZI ari pedyo navakasuruvara anoponesa vanenge varasa mwoyo.

¹⁹Nhamo dzawakarurama dzakawanda asi TENZI anomuponesa madziri dzose.

²⁰Anochengetedza mapfupa ake ose hapana kana rimwe rawo rinotyorwa.

²¹Uipi huchauraya vakaipa vanovenga varurami vachapihwa mhosva.

²²TENZI anonunura upenyu hwavaranda vake. Hapana anopotera kwaari anopiwa mhosva.