Read Bhaibhiri Idzva rechiShona Nziyo 35 Bible Online

Nziyo 35 - Bhaibhiri Idzva rechiShona bible

Nziyo 35

¹Kuipa kwakaita munhu mutadzi TENZI, navoi vanoita hondo neni, rwisai vanondirwisa.

²Torai nhoo ndiki nehuru musimuke kuzondibatsira.

³Zvuvai pfumo renyu negano renyu murwise vanondironda. Itii kwandiri, “Ndini ruponeso rwako.”

⁴Ngavanyadziswe vafumurwe vanoda kundiuraya. Ngavadzorwe vadzungaidzwe vanoronga kundiitira zvakaipa.

⁵Ngavaite sehundi inopupurutswa nemhepo vachidzinganiswa nomutumwa waTENZI.

⁶Nzira yavo ngaiite rima itsvedze vachirondwa nomutumwa waTENZI.

⁷Nokuti vakandivanzira mambure avo pasina chikonzero vakandicherera gomba pasina chikonzero.

⁸Dai waro kuparadzwa kwangovawira vasingazivi. Dai waro vangobatwa namambure avakateya; ngavawiremo vaparare.

⁹Ipapo ndichapembera kufara muna TENZI ndichifarira zvikuru kununura kwake.

¹⁰Mapfupa angu achati, “TENZI ndiani akaita semi? Imi munonunura asina simba kune ane simba kupinda iye uye murombo naasina chaanacho kumupambi.”

¹¹Zvapupu zvina utsinye zvinomuka vanondibvunza mhosva dzandisingazivi.

¹²Vanondidzorera nezvakaipa pane zvakanaka zvandakavaitira. Mwoyo wangu unoshungurudzika.

¹³Asi pavairwara, ini ndakapfeka saga, ndakazvirwadzisa nokuzvinyima. Ndairamba ndichingonamata muhana[21] mangu

¹⁴sokunge ndiri kuchema shamwari kana hama. Ndaimhemhaira sokunge ndinochema amai vangu ndakatsikitsira musoro pasi ndichiungudza.

¹⁵Asi pandakagumhinha vakaunganidzana vachifara; vakaungana kuzondirwisa mhetamakumbo dzandakanga ndisingazivi dzakaramba dzichingotaura zvakaipa nezvangu.

¹⁶Vakandisveeredza sechirema[22] vachindizhinyurira mazino.

¹⁷Kusvikira riniko nhai TENZI makangotarisa zvenyu kudai? Ndinunureiwo mukundirwisa kwavo mundinunurewo upenyu kushumba.

¹⁸Ndichakutendai musangano guru; ndichakurumbidzai mugungano guru.

¹⁹Ngavarege kufara pamusoro pangu vanondivenga pasina mhosva, varege kuchonyana maziso vaya vanondivenga pasina chikonzero.

²⁰Havataure zvinorugare; vakazvinyararira zvavo munyika vanovarongera zvinhu zvounyengedzi.

²¹Vanondishamisira muromo kwazvo vachiti, “Toko waro, Toko waro. Tazvionera nameso.”

²²Imi mazviona TENZI, musanyarare TENZI musave kure neni.

²³Zvigwinhei mumuke mundimiririre; mundirwire, imi Mwari wangu naTENZI wangu.

²⁴Ndipembedzei TENZI Mwari wangu; maererano noururami hwenyu varege kundidadira.

²⁵Ngavarege kuzviti, “Hauchionaka, zvataida tazviona.” Ngaverege kuti, “Takamumedza.”

²⁶Ngavanyadziswe vanyatsodumbirwa vanofarira nhamo dzangu. Ngavaputirwe nenyadzi nokuzvidzwa vanozviti ivo ndivo, ini vachindiisa pasi.

²⁷Regai vanoda kuti ndipembedzwe vadaidzire norufaro varambe vachiti, “TENZI mukuru anofarira kubudirira kwomuranda wake.”

²⁸Ipapo rurimi rwangu ruchakurukura zvokururama kwenyu uye nezvembiri yenyu zuva rose.