Read Bhaibhiri Idzva rechiShona Nziyo 37 Bible Online

Nziyo 37 - Bhaibhiri Idzva rechiShona bible

Nziyo 37

¹Rwiyo rwaDhavhidhi. Usazvinetse nezvevanhu vakaipa, usaitire shanje vanoita zvakaipa

²nokuti vachakurumidza kuuna souswa vachabhuruvara samakwenzi manyoro.

³Vimba naTENZI uite zvakanaka, naizvozvo uchagara panyika ugarike.

⁴Fara naTENZI iye achakupa zviri pamwoyo pako.

⁵Isa upenyu hwako muna TENZI vimba naye, iye achaona zvokuita.

⁶Achaita kuti ururami hwako hubude pachena sechiedza uye mamiriro oupenyu hwako sezuva ramasikati.

⁷Iti zii-i pana TENZI umumirire chinyararire. Usazvinetse zvako nezvomunhu anobudirira mune zvaanoita, munhu anoita zvinhu zvakaipa.

⁸Regera kuita hasha, usaite godo rega kuzvidya mwoyo zvinokupinza munezvakaipa,

⁹nokuti vakaipa vachaparadzwa asi vanotarisira naTENZI vachava ndivo varidzi venyika.

¹⁰Kunongoita kanguva kaduku chete, vakaipa panenge pasisina. Kana ukazonyatsotarisa panzvimbo yake anenge asisipo.

¹¹Asi vanozvirereka vachava ndivo varidzi venyika vachazofara nokubudirira kukuru.

¹²Munhu akaipa anorongera mururami zano rakaipa achimuzhinyurira mazino.

¹³Asi TENZI anoseka wakaipa nokuti anozviona kuti zuva rake richasvika.

¹⁴Vakaipa vanozvomora mapakatwa avo nokutatamura uta hwavo kuti vauraye varombo navasina chavanacho. Kuti vauraye vanofamba zvakarurama.

¹⁵Bakatwa ravo richavabaya ivo mwoyo uye uta hwavo huchatyorwa.

¹⁶Vakarurama zvavanazvo zvishoma zvirinani pane zvakawanda zvavakaipa vazhinji.

¹⁷Maoko avakaipa achatyorwa asi TENZI anotsigira vakarurama.

¹⁸TENZI ane hanya noupenyu hwavakarurama. Nhaka yavo ichavapo nokusingaperi.

¹⁹Pamazuva akaipa havambonyadziswa pamazuva enzara ivo vanenge vane maguta.

²⁰Asi vakaipa vachaparara mhandu dzaTENZI dzakafanana nokunaka kwamafuro anonyangarika soutsi.

²¹Muipi anokwereta asi haadzore asi mururami ane mwoyo wokupa uye anopa

²²nokuti vanokomborerwa naTENZI nyika ichava yavo asi vaanopa rushambwa vanobva vaparara.

²³Munhu kana achifamba anotungamirirwa naTENZI; anosimbisa munhu ano mugariro unomufadza

²⁴Kunyange akawa, haabva ati mbombombo nokuti TENZI ndiye anomubata ruoko.

²⁵Ndakanga ndiri muduku asi zvino ndakwegura, asi handina kumboona vakarurama vachiraswa kana vana vake vachikumbira chingwa.

²⁶Anogara achipa zvakawanda uye achikweretesa vana vake vachiva chikomborero.

²⁷Siana nouipi uite zvakanaka nokudaro uchagara nokusingaperi

²⁸nokuti TENZI anoda ruenzaniso; haarasi varurami vake. Achavachengetedza nokusingaperi asi vana vavakaipa vachaparadzwa.

²⁹Vakarurama ndivo vachava varidzi venyika uye vachagaramo nokusingaperi.

³⁰Muromo womururami unotaura zvine ungwaru rurimi rwake runotaura noruenzaniso.

³¹Mutemo waMwari wake uri maari haadzadzariki pakufamba.

³²Wakaipa anovandira wakarurama achitsvaka kumuuraya.

³³TENZI haamurege achiwira mumaoko ake kana kumurega achipiwa mhosva paanotongwa.

³⁴Mirira TENZI uchengete nzira yake. Iye achakukudza kuti nyika ive yako; unotozoona kuparadzwa kwavakaipa.

³⁵Ndakamboona munhu wakaipa ano mukundo akati dzuu kwazvo somusidhari weRebhanoni.

³⁶Ndakazopfuurazve napo asi akanga asisipo. Ndakamutsvaka asi akanga asisipo.

³⁷Tarira uone munhu akarurama uone munhu ari pachokwadi, nokuti munhu worugare aneramangwana.

³⁸Vatadzi vanofanira kuparadzwa zvachose upenyu hwavo hwamangwana huchaparadzwa.

³⁹Ruponeso rwavakarurama runobva kuna TENZI ndiye diziro ravo panguva yenhamo.

⁴⁰TENZI anovabatsira uye anovanunura. Anovanunura kuvakaipa achivaponesa nokuti vanovanda maari.