Read Bhaibhiri Idzva rechiShona Nziyo 38 Bible Online

Nziyo 38 - Bhaibhiri Idzva rechiShona bible

Nziyo 38

¹Munamato womunhu warwara TENZI regai kunditsiura muine hasha, musandirove makashatirwa

²nokuti miseve yenyu yanyatsondibaya kwazvo. Shamhu yoruoko rwenyu yakandirova.

³Hapana pachiri papenyu mumuviri wangu pamusana pokushatirwa kwenyu. Mumapfupa angu hamuna utano pamusana pechitadzo changu

⁴nokuti uipi hwanditi momote musoro, hunondiremera somutoro wandisingagoni kutakura.

⁵Maronda angu ava kuora uye avakunhuhwa pamusana poupenzi hwangu.

⁶Ndanyatsoti kokova, ndakombama ndinofamba ndichiungudza zuva rose.

⁷Muchiuno mangu muri kundipisa, hapana papenyu mumuviri wangu.

⁸Ndachiti rukutu ndapera basa ini. Ndinowuwura nokuda kwokushushika kwangu mumwoyo.

⁹TENZI zvandinosuwira munozviziva kugomera kwangu kuri pachena kwamuri.

¹⁰Hana yangu inorova, uye ndapera simba, maziso anguwo avakuonera madzerere.

¹¹Hama neshamwari dzavakumirira kure neni nokuda kwechirwere changu. Vapadyo vava kutaramukana neni.

¹²Vanoda kundiuraya vanonditeya vanoda kundikuvadza vanotaurirana zvokundiparadza vanoswerondirangana zuva rose.

¹³Asi ini ndinoita zvangu samatsi asinganzwi sechimumumu chisingatauri.

¹⁴Chokwadi ndinoita samatsi anomukanwa musina gakava.

¹⁵Asi ini ndinotarisira kwamuri TENZI asi imi TENZI Mwari wangu ndimi muchapindura

¹⁶nokuti ndinoti, “Ngavarege kunditsvinyira vanondidadira kana ndatsvedza.”

¹⁷Ndavakuda kuputsika uye ndiri kuramba ndichirwadziwa.

¹⁸Ndinoreurura zvitadzo zvangu ndine urombo nechivi changu.

¹⁹Vavengi vangu vapenyupenyu vakawanda uye vanondivenga, pasina mhosva, vazhinji.

²⁰Vanondiitira zvakaipa, ini ndichivaitira zvakanaka, vanondivenga nokuti ndinoita zvakanaka.

²¹Musandirasewo TENZI, Mwari wangu musave kure neni.

²²Kurumidzai kuzondibatsira Imi TENZI muponesi wangu.