Read Bhaibhiri Idzva rechiShona Nziyo 40 Bible Online

Nziyo 40 - Bhaibhiri Idzva rechiShona bible

Nziyo 40

¹Rwiyo rwokurumbidza nokukumbira rubatsiro Ndakamira ndamirirazve TENZI, iye akarerekera kwandiri akanzwa chichemo changu.

²Akandiburitsa mugomba rinounga, kubva munhope yomunyakwe. Akanditsikisa padombo akatsigisa kufamba kwangu.

³Akaisa rwiyo rutsva pamuromo pangu, rumbo rwokurumbidza Mwari wedu; vazhinji vachazviona vakatya vachizovimba naTENZI.

⁴Akakomborerwa munhu anovimba naTENZI asingatsaukiri kuna vanozvikudza, kuvanhu vanoteterekera kuna vamwari vasirivo.

⁵TENZI Mwari makatiitira zvinhu zvizhinji, zvinhu zvinoshamisa zvamakatirongera. Hapana angaenzaniswe nemi. Dai kuri kuti ndinozviparidza ndichizvitaura hazvaiverengeka.

⁶Zvibayiro nemipiro hazvisizvo zvamunofarira asi chamakandipa inzeve dzinonzwa. Mupiro wokupisa nomupiro wokupfupira zvitadzo hamuikumbiri.

⁷Ndipo pandakati, “Tarisai ndinouya Mubhuku rokumononora makanyorwa nezvangu muchinzi:

⁸‘Ndinofarira kuita kuda kwenyu, Mwari wangu mutemo wenyu uri mumwoyo mangu.’ ”

⁹Ndakaparidza shoko rinofadza roruponeso musangano guru. Handina kumbomedza mate[23] sokuziva kwenyu TENZI.

¹⁰Handina kuvanza mumwoyo mangu kutaura zvoruponeso rwenyu runobatsira. Ndakataura nezvokutendeka kwenyu nokununura kwenyu. Handina kuvanza mwoyochena wenyu nokutendeka kwenyu kusangano renyu guru.

¹¹Musarege henyu kundiitira tsitsi TENZI. Nomwoyochena wenyu nokutendeka kwenyu, rambai muchingondichengeta.

¹²Nokuti nhamo dzisingaverengeki dzandimomotera, zvitadzo zvangu zvandikunda zvokutotadza kuona. Zvakawanda kupinda vhudzi romusoro wangu. Ndarasa mwoyo ini.

¹³Ngazvikufadzei TENZI kundinunura Mwari chimbidzai kundibatsira.

¹⁴Vanoda kundiuraya ngavanyadziswe vadzungaire zvachose vanoda kubvuta upenyu hwangu. Ngavadzorwe vanyadziswe avo vanoda kundikuvadza.

¹⁵Ngavakatyamare pamusana pokunyara kwavo vanondisveeredza vachiti, “Tsvatu waro tsvatu waro.”

¹⁶Asi vose vanokutsvakai ngavapembere nokufara mamuri; vanoda ruponeso rwenyu ngavarambe vachiti, “TENZI mukuru.”

¹⁷Asi iniwo zvangu ndiri murombo nomunhu asina chaanacho. Asi TENZI anondifunga; ndimi mubatsiri wangu nomununuri wangu musanonoke Mwari wangu.