Read Bhaibhiri Idzva rechiShona Nziyo 42 Bible Online

Nziyo 42 - Bhaibhiri Idzva rechiShona bible

Nziyo 42

¹Munamato womunhu ari muutapwa Sokusuwira mvura inoyerera — kunoita nondo, ndiko kukusuwirai kwandinoita, Mwari.

²Mweya wangu une nyota nemi Mwari, imi Mwari mupenyu. Ndichauya riniko ndizoona uso hwaMwari?

³Upenyu hwangu yangova misodzi chete siku nesikati vanhu vachingonditi, “Iye Mwari wako aripi?”

⁴Zvinhu izvi ndinozviyeuka ndichirwadziwa mwoyo: kuenda kwandaiita negurusvusvu ravanhu ndichitungamirira dungwerungwe ravo kuimba yaMwari nomupupuru nedzimbo dzokutenda, manyore manyore avanhu vachichengeta zuva guru.

⁵Ko ndasururavara neiko kudai iyeni? Ko ndadzongodzwa mwoyo mukati mangu seiko kudai? Ndinofanira kutarisira muna Mwari nokuti ndichamurumbidzazve iye rubatsiro rwangu

⁶naMwari wangu. Ndinosuruvara mumwoyo mangu, saka zvinondipa kukurangarirai ndiri munyika yokuJorodhani nokuHerimoni, ndiri kugomo reMiza.

⁷Maungira anodairana pakutinhira kunoita mapopo enyu. Masaisai enyu ose namasundesunde andifukidza.

⁸TENZI anoratidza mwoyochena wake masikati; usiku ndinobva ndadandaura kuimba rumbo rwake kuri kunyengetera kuna Mwari woupenyu hwangu.

⁹Ndinoti kuna Mwari, dombo rangu, “Makandikanganwireiko? Ndinofambireiko ndichichema nokushushwa kwandinoitwa nemhandu?”

¹⁰Vavengi vangu vanondishora sokunge ndinodzimbirwa paronda riri mumuviri wangu. Vachingonditi, “Mwari wako aripiko?”

¹¹Ko ndasuruvara neiko kudai iyeni ko ndadzongodzwa mwoyo mukati mangu seiko kudai? Ndinotarisira kuna Mwari nokuti ndichamurumbidzazve iye rubatsiro rwangu naMwari wangu.