Read Bhaibhiri Idzva rechiShona Nziyo 44 Bible Online

Nziyo 44 - Bhaibhiri Idzva rechiShona bible

Nziyo 44

¹Nyika inokumbira kudzivirirwa Mwari isu takanzwa nenzeve dzedu, madzitateguru edu akatitaurira zvamakaita pamazuva avo pasichigare.

²Imi makadzinga vechirudzi namaoko enyu, uye kuti ivo vadzikemo misha, makatambudza vechirudzi mukavatandanisa.

³Havana kukurira nyika nehondo yebakatwa kana kukunda nesimba roruoko rwavo; asi noruoko rwenyu rworudyi nesimba roruoko rwenyu uye nechiedza chouso hwenyu nokuti makafadzwa navo.

⁴Ndimi mambo wangu naMwari wangu itii vokwaJakobho vakunde.

⁵Nesimba renyu tinokurira mhandu dzedu; nezita renyu tinotsikatsika vanotirwisa.

⁶Handivimbi nouta hwangu kunyange bakatwa rangu harindiponesi.

⁷Asi imi makatinunura kumhandu dzedu mukanyadzisa vanotivenga.

⁸Tinovimba nguva dzose naMwari wedu uye tichatenda Mwari wedu nokusingaperi. Dzepfunde.

⁹Asi zvino makatirasa mukatinyadzisa uye hamuna kutsigirana nehondo dzedu.

¹⁰Mukaita kuti titize vavengi vedu mhandu dzedu dzikatowana zvadzo zvokupamba.

¹¹Makatiita sehwai dzokubaya mukatimwararisa mukati memarudzi.

¹²Makatengesa vanhu venyu nomutengo usina maturo asi chamakabura ipapo hapana.

¹³Makatishoresa navavakidzani vedu tikave chiseko nechinhu chinonyombwa navakatipoteredza.

¹⁴Tatove tsumo pakati pevechirudzi. Mukati mavanhu, tinotodzungudzirwa musoro.

¹⁵Zuva rose ndinoswera ndichinyara ndadonha uso nokunyara

¹⁶namashoko okunyomba nokushora pamberi pomuvengi nomutsividzi.

¹⁷Zvose izvi zvakatiwira asi isu tisina kukukanganwai kana kusatendeka kuchitenderano chenyu.

¹⁸Mwoyo yedu haina kufuratira uye tsoka dzedu hadzina kutsauka pagwara renyu.

¹⁹Asi imi makatipwanya panzvimbo inogara makava, mukatifukidza nerima rakati kwirindindi.

²⁰Dai kuri kuti takakanganwa zita raMwari wedu kana kusimudzira maoko edu kuna Mwari asiri iye,

²¹iye Mwari angadai asina kuzviona here? Nokuti anoziva wani zviri mumwoyo zvakavandika.

²²Inga tinouraiwa zuva rose tichitorwa sehwai dzokubaya.

²³Mukai TENZI, munokotsirireiko? Mukai musatirase zvachose.

²⁴Munozvivanzirei uso? Munokanganwirei nhamo nokushushwa kwatinoitwa.

²⁵Tazvambarara muguruva, tachiti kwati kwati pasi.

²⁶Simukai muuye kuzotibatsira. Tinunureiwo nokuda kwomwoyochena wenyu.